.:Radio Timor Kmanek Lian Nain Feto
.:: 2017 Tinan Sagrada Escritura : Moris Ba Biblia, Iha Biblia, Ho Biblia, No Husi Biblia ::.


Programa Detalho

“EMA NEBE HAN AI-HAN NEE, NIA SEI MORIS BA NAFATIN”

Image 03

LEITURA NO REFLEXÃO BA DOMINGO XIX TEMPO COMUM

Primeira Leitura

Lia hosi Livru Liurai sira nian(1Rs 19,4-8):

Iha loron hirak neba, Elias lao loron tomak ida, iha rai fuik maran. Hafoin, nia tuur tiha iha ai- oan ida nia hun, hodi hein deit ona atu mate. Nia dehan: “Nai, natoon ona ba! Halo hau mate tiha ba! Basá, hau laos diak liu hau aman sira !” Elias latan-an ba rai, dukur tiha iha ai-hun oan nee nia mahan. Maibé, Anjo ida mai fanu nia, hodi dehan: “Hader atu han!” Elias loke matan, haree, besik nia ulun, pão fuan ida, tunu deit iha ahi klaak, haree mos wé, iha buli ida. Elias han no hemu tiha, nia toba hikas. Nai Maromak nia Anjo mai fanu nia dala ida tan, hodi hateten ba nia: “Hader atu han, basá, dalan ó atu lao, sei naruk”. Elias hader tiha, nia han, nia hemu. Hafoin, nia hamriik lao loron hatnulu no kalan hatnulu, too Horeb, katak Maromak nia foho.

Maromak Futar Lia.

 

Salmo Responsorial

Refrão: Imi koko ba hodi haree, Nai nia diak oinsá! Repete-se

Hahi Maromak loron kalan;

Hau ibun hahi nafatin Nia.

Maromak mak hau nia Glória.

Ema kiik sira rona Nia ho ksolok. Refrão

 

Hamutuk ho hau, imi haklaken Nai nia kmanek,

Hamutuk, ita hahí Nia naran.

Hau buka Maromak, Nia rona hau,

Nia hasai hau hosi susar laran. Refrão

 

Imi fihir Nia, imi laran sei haksolok;

Imi oin sei la nakraik.

Kiak oan ida hakilar, simu duni tulun,

Nia simu kman ba nia terus tomak. Refrão

 

Maromak Anjo tau matan ba nia emar sira,

Atu soy sira.

Imi koko to’ok ba, hodi haree, Nai diak oinsa,

Rahun diak ba ema nebe halai buka nia. Refrão

 

 

 

 

Segunda Leitura

Lia hosi São Paulo nia surat

ba sarani sira iha Êfeso(Ef 4,3—5,2)

 

Maun alin sira: Keta halo Maromak nia Espírito Santo laran susar, basá, Nia tau hela ona sinal ba imi, atu too loron, Nia soy imi. Halakon tiha husi imi leet imi nia hirus, imi nia laran nakali, imi nia lian makas, imi nia hotar malu. Imi halakon tiha hosi imi nia leet, imi nia laran aat tomak. Imi buka laran diak ba malu, sadia malu. Imi perdua malu, nudar Maromak perdua imi tan Cristo. Nee duni, imi hakas-an banati tuir Maromak, nudar Maromak nia oan doben tebes. Imi buka hadomi malu diak liu tan, hanesan Cristo hadomi ita, too saran-an ba Maromak tan ita, hodi hasae-An ba Maromak, nudar mutun ida kmanek liu, iha Maromak futar oin.

 

Maromak Futar Lia.

 

Aclamação

 

Refrão: Aleluia. repete-se

Nai lia tun:

Hau ai-han moris tun hosi lalehan;

ema se han ai-han nee,

sei moris tinan ba tinan. Refrão

 

Evangelho (Jo 6,41-52)

 

Nai Jesus Cristo nia Evangelho

Nudar São João haktuir

 

Iha tempo neba, ema judeu sira hamúu (Murmura) Jesus, tamba Nia dehan: “Hau, ai-han tun hosi lalehan”. Sira hateten: “Nia laos Jesus, José nia oan? Ita la hatene nia inan no aman? Nusá, mak horas nee Nia hateten: Hau tun mai hosi lalehan?” Jesus lia tun ba sira: imi keta múmuk iha imi leet. Hau Aman, nebe haruka Hau mai, la dada karik, ema ida la bele besik mai Hau, Hau sei halo nia, moris hias iha loron ikus. Profeta sira hakerek nanis ona, dehan: “Maromak rasik sei hanorin ema hotu”. Ema tomak nebe fo laran ba Aman Maromak no rona nia hanorin, ema nee mak hakbesik mak Hau. Nee laos katak, ema ruma haree ona Aman Maromak; ema nebe Maromak haruka mai, mak haree Aman Maromak. Hau dehan tebes ba imi: ema nebe fiar, ema nee hetan duni moris rohan laek. Hau mak ai-han moris nian. Iha rai fuik maran, imi bei-ala sira han Maná, sira mate hotu ona. Maibé, ai-han tun mai hosi lalehan, mak Ida nee. Ema nebe han ai-han nee, nia sei la mate. Hau rasik mak ai-han moris nian, tun hosi lalehan. Ema nebe han ai-han nee, nia sei moris ba nafatin. Ai-han Hau fo, mak Hau nia isin, saran ba rai-klaran nia moris. Lia Maksoyn*** (Chandra).

 

 

REFLEXÃO; “EMA NEBE HAN AI-HAN NEE, NIA SEI MORIS BA NAFATIN”

(Jo 6,50)

           

Amu Papa Paulo VI dala ida hatete:”Perigo boot ba moris sarani ohin loron mak, comete pecado maibé, sente-an la sala”. Homília nee barak ka oitoan, hakarak reflecte directamente ba hahalok ita sarani ohin loron nian. Imagina took, ohin loron ema halo sala contra Maromak nia ukun fuan maibé, nunca sente-an katak hahalok nee la diak. Amu Bispo Dom Basílio iha ninia homília sira durante visita Cruz Jovem ho Ilas Nain Feto Peregrina nee, sempre bolu atenção kona hahalok ida nee.

Nudar bibi-atan ba Diocese ida nee, Dom Basílio hatete katak; Ohin, Timor tomak 97% Católicos << ...>> ema dehan katak ita nee maior País Católico da Ásia. <<...>> Proporcionalmente Timor Leste Maior País Católico no Mundo. Proporcionalmente katak ita ema oitoan maibé, iha ita nia leet, entre ema 100, 99% Católico. <<...hau quando rona buat ida nee, hau nia kabeen atu boot ba lalos, maibé, quando tun fali iha Aeroporto Comoro haree ba ita nia realidade ida nee hau dehan; los ita nee iha rai liur ema gaba ita capaz maibé, mai iha ita nia uma laran nee; naokten, naokten nafatin, bosokten, bosokten nafatin, corruptor, corruptor nafatin, cama rua, cama rua nafatin, <<...>> hau hanoin nee desafio boot ida ba ita.  

            Reflecte ba Dom Basílio nia lifuan hirak nee, ita bele nota katak; ohin loron ita nia fuan toos ona atu distingui saida mak pecado no saida mak laos pecado. Realidade ida nee justifca duni saida mak amu Pap Paulo VI koalia nanis ona wainhira nia sei moris.

Maske Cruz Santa ho Ilas Nain Feto visita sai bairro tama bairro maibé, momento diak hirak nee seidauk consegue muda sarani balu nia fuan. Ema ódia malu nafatin, ema laran moras malu nafatin, ema baruk ten nafatin, ema naok ten nafatin. Ba ida nee, são paulo iha nia carta ba Êfeso hatete;”Halakon tiha husi imi leet imi nia hirus, imi nia laran nakali, imi nia lian makas, imi nia hotar malu. Imi halakon tiha hosi imi nia leet, imi nia laran aat tomak. Imi buka laran diak ba malu, sadia malu. Imi perdua malu, nudar Maromak perdua imi tan Cristo”. Ita iha esperança boot katak; tinan 500 nee loke ona dalan atu ema Católico transforma sira nia hahalok.

             Problema boot nebe ema barak questiona no ema confusão iha ema nia fuan mak, Mistério incrnação:Maromak Oan halo-an ba ema. Problema nia hun mak; ema murmura dehan oinsa Maromak bele hola isin hanesan ema hodi mai terus fali iha mundo nee? Confusão boot mosu liu tan wainhira Jesus rasik proclama Nia-An katak; Nia mak pão moris tuun husi Lalehan, “ema nebe han ai-han nee, nia sei moris ba nafatin” (Jo 6,50). Tanba confusão nee mak halo ema Judeu balu murmura Jesus wainhira temi kona ba Jesus nia-an nudar Ai-han tuun husi lalehan. Talvés ida nee mak halo, sarani barak seidauk consegue compreende Jesus Cristo nia presença real iha Eucaristia no mos iha sacrário (Santíssimo Sacramento).

            Se ita contempla ho óculo fé nian, ita bele compreende ona diferença entre maná iha Antigo Testamento ho Jesus Cristo nia-An rasik iha Novo Testamento. Kona ba nee, Jesus rasik hatete fil-fila ona katak; imi nia beiala sira han maná maibé, sira mate hotu ona. Hau mak ai-han tuun husi lalehan, ema nebe han ai-han nee, sei la mate tan. Iha relato completo, ikus mai Jesus rasik proclama katak; ai-han nebe Jesus atu fo mak Nia isin rasik.

            Iha analogia ida nebe dehan:”Sebelum Anda mengeluh tentang rasa dari makanan yang Anda santap, Pikirkan tentang seseorang yang tidak punya apapun untuk dimakan”. Analogia ida nee, ita bele liga kedas ba Primeira leitura semana kotuk nian nebe haktuir kona ba povo nia murmura/lamenta hasoru Moises tan sira hamlaha. Situação ida nee, hetan kedas nia justificação iha Evangelho wainhira Jesus trata ema hirak hobur tuir nia dehan; sira laos tuir tanba doutrina ho milagre sira maibé, sira tuir tanba han pão too bosu didiak. Bosu tiha hotu, fila continua murmura Jesus. Cristo halo ona buat barak maibé, sira nia laran sei tos nafatin hodi la fiar iha Nia.

            Kmanek liu tan ba ita hodi koko refelcte oinsa Jesus nia lia fuan kona ba ai-han moris rohan laek. Ita hanoin hetan pão nebe ita han iha tempo dader, molok sai pão, ninia material básico nee mai husi trigo. Trigo nee rasik ema kuda iha rai. Jesus actualisa Nia-An nudar pão moris, hodi liga directamente ai-han nebe produz iha rai. Wainhira Pão nee coloca ona iha altar leten, ninia aparência sei muda tiha ba forma seluk.

Tuir Doutrina Igreja Católica nian, ita hanaran processo transubstância significa; amu lulik consagra tiha pão nebe mai husi rai sai tiha Cristo nia futar isin hodi fo moris ba ita. Los duni katak ho matan, ita haree pão nafatin deit, maibé, iha oculo fiar nian, ida nee mak ai-han nebe transforma ona ba Jesus nia futar isin. Jesus rasik proclama katak; ema nebe han ai-han nee, nia sei moris ba nafatin.

Loro-loron ita preocupa ho ita nia serviço sira hodi garante ita nia moris iha mundo nee. Ita fera ulun tun sae hodi halo serviço ba isin nian. Ita nunca fo netik tempo ba hodi buka serviço hetan ai-han ba klamar nian.

            Furak liu tan ba ita nudar sarani hodi reflecte ita nia preocupação lorloron hodi reflecte ema budista sira nia lia fuan tuir mai: :”As pessoas perdem a saúde para juntar o dinheiro. Depois perdem dinheiro para recuperar a saúde. E por pensarem ansiosamnete no futuro. Esquecem o presente de tal forma que acabam por não viver o presente nem o futuro. E vivem como se nunca fossem morrer. E morrrem como se nunca tivessem vivido”.

Fulan Agosto ida nee, sarani Católico iha Timor laran tomak prepara-an hela hodi festeja tinan 500, Timor oan Conhece Jesus Cristo. Dom Basílio hatete fil-fila ona katak; husi liur (Porporsionalmente) Católico 97% maibé, iha laran mesak sabraut tan-tanan deit. Evento Cruz ho Ilas Nain feto visita cada paróquia nee, tuir los nudar manifestação exterior deit husi sarani nia fiar nebe klean. Fiar nia plenitude nee, precisa hatudu diak liu tan iha participação iha Eucaristia (Missa). Basá, iha Eucaristia mak, ita nudar sarani, além de cria relação íntima ho Maromak, ita mos hetan netik ai-han nebe habosu klamar nudar sarani. Se lae, hanesan amu Papa Francisco hatete ba sarani sira iha América Latina katak; Mundo ohin loron, ema buka osan bula rai too haluha tiha Jesus Cristo iha Eucaristia. Diak liu ita koko hodi haree, Nai nia diak oinsa.***(IgnasBAFS).

 





Komentario :


Prense Komentario :
Naran :
Website :
Komentario
 
 (Hatama kode 6 iha leten)

 

Notisia Seluk

CHAMADA HODI CESSAR-FOGO IHA FUNU IÊMEN NIAN, WAINHIRA LIUTIHA BOMBARDEIO

RTKNews,(edição Terça  Feira 18/10/2016);Dili-SBS World News Radio: ...

ATAQUE CONTRA ACAMPAMENTOS ISIS NIAN, LAOS HO VINGANÇA

RTKNews,(edição Terça  Feira 18/10/2016);Dili-Rádio ...

PRESIDENTE FUNDAÇÃO GRAÇA DEUS RECONHESE RELATÓRIO PESQUIZA NEBE PÚBLICA IHA MÉDIA LALOS

RTKNews,(edição Terça-feira,18/10/2016);Dili– Relaciona ho resultado ...

TIMOR LESTE PERCISA IHA HELICOPTRE NO RO BOOT

RTKNews,(edição Terça  Feira 18/10/2016);Dili-Tersa feira nee (18-10-16) ...

Programa Seluk

RONA NO HALO TUIR

HAU NIA INAN NO MAUN ALIN SIRA MAK; SIRA NEBE RONA NO HALO TUIR MAROMAK NIA LIAFUAN  (Husi ...

“JESUS MAK PAO MORIS”.

Belun Católica doben sira hotu, ohin ita tama ba domingo sanulu resin-sia tempo  ...

“EMA NEBE HAN AI-HAN NEE, NIA SEI MORIS BA NAFATIN”

LEITURA NO REFLEXÃO BA DOMINGO XIX TEMPO COMUM Primeira Leitura Lia hosi Livru Liurai sira ...

HAU MAK AI-HAN MORIS NIAN, EMA NEBE HAKBESIK HAU, NIA SEI LA HAMLAHA TAN; EMA NEBE FIAR IHA HAU, NIA

HAU MAK AI-HAN MORIS NIAN, EMA NEBE HAKBESIK HAU, NIA SEI LA HAMLAHA TAN; EMA NEBE FIAR IHA HAU, ...

IMI BUKA HAU, ...TAN IMI HAN PÃO TOO BOSU DIDIAK

LEITURA BA DOMINGO XVIII TEMPO (COMUM) BAIBAIN. Primeira Leitura: Lia housi Livro Êxodo (Ex ...

Hit Counter

Visita Ohin Loron : 50
Total Visitor : 1278229
Hits Ohin Loron : 75
Total Hits : 9439431
Online Hela : 12