.:Radio Timor Kmanek Lian Nain Feto
.:: 2017 Tinan Sagrada Escritura : Moris Ba Biblia, Iha Biblia, Ho Biblia, No Husi Biblia ::.


Programa Detalho

IMI BUKA HAU, ...TAN IMI HAN PÃO TOO BOSU DIDIAK

Image 03

LEITURA BA DOMINGO XVIII TEMPO (COMUM) BAIBAIN.

Primeira Leitura: Lia housi Livro Êxodo (Ex 16,2-4.12-15):

Iha loron hirak nebá, iha rai fuik maran, Israel oan sira hotu hahú hamúu (murmura) Moises no Aarão. Israel oan sira hateten ba sira Nain rua: “Ami mate tiha karik iha rai Egipto, iha Maromak nia liman, kala diak liu; wainhira ami tur hein hela naan iha sanan, wainhira ami sai han pão tuir ami nia hakaran! Imi dada ami mai iha rai-fuik maran ida nee atu halo povo ida nee mate hotu tan hamlaha”. Tan nee, Maromak lia tun ba Moises: “Hau sei halo ai-han namkari housi lalehan ba imi. Povo sei sai ba hili ai-han nee natón deit ba loron ida-ida nian. Nunee, Hau hakarak haree povo nee tuir eh la tuir Hau nia ukun. Hau rona Israel oan sira hamúu Hau. Tan nee, ó sei hateten ba sira: Ohin loro-kraik imi sei han naan. Aban dader imi sei han pão too bosu. Nunee, imi hatene katak Hau mak Nai, imi nia Maromak”. Iha loron nee, mosu duni kiukai barak teb-tebes, too taka metin sira nia ai-hun. Iha fali dadersán, maha-wén labis ida hadulas tiha sira nia ai-hun. Maha-wén nee maran tiha, mosu kedas iha rai leten buat oak ida hanesan wé furin mak taka rai. Haree tiha nee, Israel oan sira husu ba malu: “Manhu? Katak sá mak nee”. – basá, sira la hatene buat nee. Moises hateten ba sira: “Nee ai-han Maromak haraik ba imi atu han”. Maromak Futar Lia.

 

Salmo Responsorial (Sal 77 (78) 3,4bc.23-24. 25. 54)

Refrão: Nai haraik ai-han ba sira. Repete-se

Ami rona dehan, ami aman sira haktuir mai ami

Nai kbiit no buat foun Nia halo.    Refrão

 

Nia lia tun ba kolahan sira iha lalehan,

Nia loke odamatan lalehan;

Nia hamonu maná hodi fo han sira,

Nia haraik ai-han lalehan ba sira. Refrão

 

Ema ida-idak be han kbiit Nain sira nia ai-han;

Maromak haraik ai-han wa’in ba sira.

Nia lori sir aba nia rai santa

Lori ba foho nebé nia manán. Refrão.

Segunda Leitura; Lia housi São Paulo nia surat ba sarani sira iha Êfeso (Ef 4, 17. 20-24):

Maun alin sira: Hodi Maromak nia naran, Hau hateten sai ba imi: hodi hanorin  ida nee ba imi: Gentio sira moris tuir sira nia moris folin laek. Imi la bele moris hanesan sira. Imi rona ema hanorin  lolós karik kona ba Jesus, imi sei haree katak laós nunee mak imi hahu hatene Cristo. Imi sei husik imi nia moris uluk nian, imi la bele sai tan hanesan uluk wainhira imi halo tuir deit imi nia hakaran aat. Imi halo didiak imi laran, imi hakiak hahalok diak ema foun, Maromak ílas nian, tuir justiça no moris santo lolós. Maromak Futar Lia.

 

Aclamação

Refrão: Aleluia. Repete-se

 

Ema la moris ho deit ai-han

Maibé, ho lia-fuan hotu nebé

mai husi Maromak futar ibun. Refrão

 

Evangelho

Nai Jesus Cristo nia Evangelho Nudar São João (Jo 6, 24-35) haktuir:

Iha tempo nebá, ema sira haree katak Jesus ho nia Escolante sira la iha ona tasi ibun. Tan nee, sira sa’e hotu ba ro, he’an too Cafarnaum atu buka Jesus. Hetan tiha Jesus iha tasi sorin balu ba, sira dehan ba Nia: “Mestre, Ita too iha nee houri bain hira?” Jesus lia tun ba sira: “Hau dehan tebes ba imi: imi buka Hau, laós tan imi haree milagre sira, maibé, tan imi han pão too bosu didiak. Imi sei kaer serviço, laós tan ba ai-han nebé mohu, maibé, tan ai-han nebé la mohu tinan ba tinan. Ai-han nee, Mane Maksoin mak sei haraik ba imi. Ba Mane Maksoin nee duni, mak Aman Maromak tau marca. Sira hasae  lia ba Nia, dehan: “Ami sei halo lós sá atu kaer Maromak nia serviço?” Jesus lia tun ba sira: “Maromak nia serviço mak ida nee: Imi fiar Ema nebé Nia haruka mai”. Sira hasae fali lia ba Nia: “Ita halo milagre sá, atu ami haree hodi fiar? Ita halo buat foun sá? Iha rai fuik-maran ami nia bei-ala sira han Maná, nudar Escritura hateten: Sira han pão ida tun housi lalehan”. Jesus lia tun ba sira: “Hau dehan tebes ba imi: laós Moises mak fo ba imi pão be tun housi lalehan. Maromak nia ai-han mak tun housi lalehan, atu fo moris ba mundo”. Sira dehan ba Nia: “Nai, haraik nafatin ai-han nee mai ami!” Jesus hatán ba sira: “Hau mak ai-han moris nian: Ema nebé hakbesik mai Hau, nia sei la hamlaha tan; ema nebé fiar Hau, nia sei la hamrook tan”. Lia Maksoin.*** (Chandra)

Reflexão; IMI BUKA HAU, ...TAN IMI HAN PÃO TOO BOSU DIDIAK

 

            Maluk leitor doben sira………………….! Ema anónimo ida hakerek lia murak tuir mai hodi dehan:”Valorize quem te valoriza! Porque o resto só te procura quando precisa”. ita bele compreende lia fuan nee hodi tau iha neon katak; Fo valor ba ema nebe considera eh valoriza o! Basá, sira seluk só buka o, wainhira sira precisa. Liu tiha situação susar ruma, sira sei la buka tan o. Analogia nee merece liu atu ita emprega ba Jesus nia lia kroat hanesan Evangelho haktuir.

             Mentalidade dependente dala barak impede ema atu desenvolve sira nia creatividade. Sira hein aproveita deit ema seluk nia esforço. Husi lalaok dependente nee mak ikus mai produs ema lobuk ida nebe sai hanesan oportunista iha sociedade. Balu sai oportunista nebe hein foti funan tuir lisan husi ema seluk nia terus. Balu sai maulambe-bilambe hodi moris husi lalatak ukun nain balu nia carisma. Balu finge fiel (setia) ba sira nia patrão hodi hetan netik etu bikan ida (carreira política) ba nia kabun. Balu fali professa doutrina asal bapak senang atu nia hetan confiança nafatin, maske de facto nia la contribui buat ida ba nação. Balu fali sai traidor nebe troca kulit basea ba situação.

            Jesus Cristo halo crítica ida nebe forte tebtebes ba ema lubun nebe hobur tuir Nia.  Jesus tenik:“Hau dehan tebes ba imi: imi buka Hau, laós tan imi haree milagre sira, maibé, tan imi han pão too bosu didiak//«Em verdade, em verdade vos digo: vós procurais-me, não por terdes visto sinais miraculosos, mas porque comestes dos pães e vos saciastes (Jo 6,26). Leitura evangélica Domingo semana nee, reflecte momos kona ba mentalidade dependente nebe implica ba caractér oportunista, nudar descreve iha leten.

            Nudar Maromak Jesus hatene katak ema lubun nebe hobur tuir Jesus, tanba milagre multiplicação pão laos tanba fiar  Jesus no halo tuir saida mak Jesus haruka. Iha diálogo nebe ita acompanha iha Evangelho hateten: “Sira hasae  lia ba Nia, dehan: “Ami sei halo lós sá atu kaer Maromak nia serviço?””Atu justifica ida nee, Jesus hatete claro ona iha Evangelho katak; “Maromak nia serviço mak ida nee: Imi fiar Ema nebé Nia haruka mai”.

            Mentalidade dependente nee hatudu kedas ona iha Isarel nia beiala sira, nudar haktuir iha livro êxodo primeira leitura nian. Sira murmura Moises até murmura tan Maromak. Maske Maromak hatan ba sira nia lamentação maibé, buat nebe acontece mak; sira depende deit ba Ai-han (Maná) nebe Maromak fo. Sira la halo serviço hodi sustenta moris maibé, tur hein deit atu lorloron Maromak fo han sira ho Maná. Lalaok nee afinal continua kedas husi geração ba geração too Jesus nia tempo.

            Reflecte ba Evangelho Domingo semana nee no liga ba realidade moris ema nian, ita bele foti lição ida katak horas nee, ema hakbesik ba Maromak wainhira sira sente precisa. Sarani reza, ba missa, fo esmola wainhira sira monu iha susar laran, político sira hakbesik-an ba Uma Kreda wainhira besik Eleição Geral, Kaben nain balu badinas reza, halo novena, visita gruta, visita Santíssimo Sacramento, wainhira sira hasoru dificuldade ruma, katuas-ferik balu, ba missa ho intenção husu missa ba matebian hodi bele manan netk SDSB.

Ba mentalidade nee, Nai Maromak hatete nanis ona iha livro Profeta Isaías katak; ...povu ida nee mai hakbesik ho nia ibun no hahi hau ho ibun deit maibé, sira laran dook tebes husi hau. Sira nia oração la ho fuan no laran loloos”// «Este povo aproxima-se de mim só com palavras, e honra-me só com os lábios, pois o seu coração está longe de mim e o culto que me presta é apenas preceito humano e rotineiro (Is 29,13, cf Mt 15,8-9; Mc 7,6-7). São nudar hakerek ba sarani sira iha Êfeso sira, fo hanoin mos ita dehan:” Maun alin sira: ... <<Imi la bele moris hanesan Gentio sira>>>... <<<Imi sei husik imi nia moris uluk nian>>>, ... <<<imi hakiak hahalok diak ema foun, Maromak  ílas nian, tuir justiça no moris santo lolós”.

Buat nebe Maromak hakarak husi ita mak; cumpri lolos mandamento sira nebe Jesus hanorin ona ho tau fiar metin iha neba. Papa Francisco mos hametin ita nia fiar hodi dehan: “Ter Fé é acreditar naquilo que você não vê; a recompensa por essa fé é ver aquilo em que você acredita”. Profeta Job fortifica Papa nia lia menon nee hodi dehan:”Tanba nee mak iha livro Job nian dehan:”Simu ba saida mak Nai hanorin liu hosi nia ibun, no tau lia fuan nee iha o nia laran” (Job 22,22)”. (IgnasBAFS)

 





Komentario :


Prense Komentario :
Naran :
Website :
Komentario
 
 (Hatama kode 6 iha leten)

 

Notisia Seluk

CHAMADA HODI CESSAR-FOGO IHA FUNU IÊMEN NIAN, WAINHIRA LIUTIHA BOMBARDEIO

RTKNews,(edição Terça  Feira 18/10/2016);Dili-SBS World News Radio: ...

ATAQUE CONTRA ACAMPAMENTOS ISIS NIAN, LAOS HO VINGANÇA

RTKNews,(edição Terça  Feira 18/10/2016);Dili-Rádio ...

PRESIDENTE FUNDAÇÃO GRAÇA DEUS RECONHESE RELATÓRIO PESQUIZA NEBE PÚBLICA IHA MÉDIA LALOS

RTKNews,(edição Terça-feira,18/10/2016);Dili– Relaciona ho resultado ...

TIMOR LESTE PERCISA IHA HELICOPTRE NO RO BOOT

RTKNews,(edição Terça  Feira 18/10/2016);Dili-Tersa feira nee (18-10-16) ...

Programa Seluk

RONA NO HALO TUIR

HAU NIA INAN NO MAUN ALIN SIRA MAK; SIRA NEBE RONA NO HALO TUIR MAROMAK NIA LIAFUAN  (Husi ...

“JESUS MAK PAO MORIS”.

Belun Católica doben sira hotu, ohin ita tama ba domingo sanulu resin-sia tempo  ...

“EMA NEBE HAN AI-HAN NEE, NIA SEI MORIS BA NAFATIN”

LEITURA NO REFLEXÃO BA DOMINGO XIX TEMPO COMUM Primeira Leitura Lia hosi Livru Liurai sira ...

HAU MAK AI-HAN MORIS NIAN, EMA NEBE HAKBESIK HAU, NIA SEI LA HAMLAHA TAN; EMA NEBE FIAR IHA HAU, NIA

HAU MAK AI-HAN MORIS NIAN, EMA NEBE HAKBESIK HAU, NIA SEI LA HAMLAHA TAN; EMA NEBE FIAR IHA HAU, ...

IMI BUKA HAU, ...TAN IMI HAN PÃO TOO BOSU DIDIAK

LEITURA BA DOMINGO XVIII TEMPO (COMUM) BAIBAIN. Primeira Leitura: Lia housi Livro Êxodo (Ex ...

Hit Counter

Visita Ohin Loron : 2277
Total Visitor : 1177675
Hits Ohin Loron : 10182
Total Hits : 8872538
Online Hela : 20