.:Radio Timor Kmanek Lian Nain Feto
.:: 2017 Tinan Sagrada Escritura : Moris Ba Biblia, Iha Biblia, Ho Biblia, No Husi Biblia ::.


Programa Detalho

“FINI MAK MAROMAK FUTAR LIA, CRISTO MAK EMA NEBE KUDA”

Image 03

 

“FINI MAK MAROMAK FUTAR LIA, CRISTO MAK EMA NEBE KUDA”

(Hafunan Fiar)

Fr. Roménio do Amaral Magalhães

Olá belun leitor sira hotu! Oinsá ho ita boot sira nia condição ba loron ida ohin? ami espera katak ita boot sira nia condição saudável nafatin hodi acompanha programa ida nee too nia rohan.

Domingo semana nee, ita tama ona ba Domingo dala XI tempo comum ninian. Tan nee, leitura sira bolu hikas ita atu tau atenção ba modo maravilhoso hanesan Reino Maromak nian nebe mak namkari(difunde) iha mundo ida nee. No ita nia reflexão semana nee nian hafanun fila fali ita hirak nebe dukur no ita sira nebe hader ona maibé, matan foti la sae atu hateke ba Reino Maromak nian liu husi ita Nai Jesus Cristo nia presença iha mundo ida nee.

Ita Nai Jesus Cristo nia presença ida nee mos representa Aman Maromak nia-an mai iha rai ida nee; tan nee ema nebe fiar Jesus Cristo hanesan nia fiar iha Aman Maromak; no ema nebe hadomi Cristo katak nia hadomi Aman Maromak basá Cristo no Aman Maromak ida deit. No liu husi Jesus Cristo mak ita hetan graça oi-oin husi Aman Maromak ba diak tomak nebe ita precisa iha ita nia moris liu husi oração sira nebe ita hasae lor-loron.

Ita mos foin celebra festa Sagrado Coração de Jesus iha Sesta-Feira liu ba nee no Padroeira Diocese Maliana nian; liu husi festa ida nee hakarak fo hanoin fali mai ita kona baJesus nia Futar Fuan nia hun mak Maromak Filho halo-an ba ema. Tamba Nia Maromak hamutuk ho Aman no Espírito Santo. Jesus nia futar fuan simboliza no fo hanoin mai ita, Nia domin rohan laek ba ema hotu.

Tan nee, hau convida ita hotu atu ba lee hamutuk evangelho ba Domingo XI tempo comum ninian iha Ano B, nebe foti husi evangelho São Mc. 4, 26-34. Mai ita ba rona hamutuk.

Na’i Jesus Cristo nia Evangelho nudar São Marcos haktuir:

Iha tempo nebá, Jesus dehan ba ema lubun boot:“Reino Maromak nian, hanesan ema ida nebe kari fini iha rai. Toba eh hamriik, iha kalan eh iha loron, wainhira fini moris no boot ba daudaun, nia la hatene tuir moris oinsá. Rai hamoris mesak nia, uluk liu nia hun, tuir mai nia fulin, ikus liu trigo tasak iha fulin. Wainhira too ona tempo atu ko’a, nia tau kedas tudik atu ko’a; toos pronto ona”. Jesus dehan mos nunee: “Basá, ita sei compara Reino Maromak nian? Housi aiknanoik ida nebe ita bele hatudu? Hanesan mustarda musan ida nebe atu kuda iha rai, nia mak musan kiik liu hotu iha rai. Maibé, kuda tiha hahú moris, sai boot liu hotu modo sira iha toos laran, hodi soe tahan mesak bobot nebe manu sira lalehan nian bele hamahan-an iha nia mahan”. Jesus haklaken Maromak nia liafuan ba sira ho aiknanoik barak hanesan nee, tuir sira nia bele. Nia la ko’alia ba sira se lae housi aiknanoik deit, maibé, dehan los hotu ba Escolante sira, wainhira sira mesak.

Lia Maksoin

 

 

 

TEMA:

“Fini mak Maromak futar lia, Cristo mak ema nebe kuda; ema hotu nebe hetan Nia, hetan moris rohan laek”.

Nudar ema criatura, ita buka atu hakruuk iha criador nia futar oin hodi fo agradece, hahi no adora Nia; basá, ita mai husi Nia no Nia mak halo ita moris iha mundo ida nee tuir Ninia imagem; katak ita hola ilas Aman Maromak nian; tan nee iha Sagrada Escritura mos hateten nunee:“Deus criou o ser humano à sua imagem, criou-o à imagem de Deus”(Cf.Gen.1,27).

Ho Amam Maromak nia domin tomak, Nia haraik mai ita espírito, klamar no isin ida basá ita única imagem nebe hola ilas Maromak nian hodi bali no tau matan ba criatura sira seluk. Ida nee hatudu mos katak criatura hot-hotu nebe pertence iha mundo ida nee nia nain no nia hun mak Aman Maromak rasik no la iha tan buat seluk nebe mak sai nain ba criatura hirak nee.

            Tan hadomi ema iha mundo ida nee, Nia haruka ninia Oan Mane mesak Jesus Cristo mai iha mundo atu salva no hasai Nai nia emar sira nebe terus iha nakukun laran (pecado) hodi ba moris iha naroman Nai nian, katak moris iha tranquilidade, dame, paz, hakmatek no moris iha domin nia laran. Iha Jesus nia hanorin sira mos haktuir nunee:“Basá, Maromak hadomi tebes mundo too fo Nia Oan Mane mesak atu ema hotu nebe fiar iha Nia la bele lakon, maibé, hetan moris rohan laek”,“Deus amou tanto o mundo, que lhe entregou o seu Filho Unigénito, a fim de que todo o que crê nele não se perca, mas tenha a vida eterna”(Cf. Jo.3,16).

Liu husi Cristo nia presença ida nee mak ita bele hetan acesso ba iha Aman Maromak; basá, presença Cristo nian Nia representa mos Aman Maromak nia fatin katak Aman Maromak horik hamutuk ho Nia; no husi Cristo ema barak mak hetan salvação no lori ema ba iha Reino Maromak nian, katak liu husi Cristo nia presença halo ema ba dame malu ho Maromak e hanorin ema atu halo tuir Nai nia ukunfuan sira no moris tuir Na’i nia hakaran iha ita nia aan hodi prática iha ita nia moris lor-loron nian. Tan nee Cristo sai hanesan ai cedro nebe buras teb-tebes hodi fo fuan ba ema hotu atu bele han aifuan ida nee hodi senti ai fuan ida nee nia midar.  Basá, iha Primeira leitura livro Profeta Ezequiel nian nebe ohin ita rona hateten mos katak: “Nia sanak sei sai barak hodi fo fuan tebar no sei sai ai cedro buras tebes. Mano sira hotu sei mai halo nia knuuk iha nia leten, mano sira oi-oin sei hamahan-an iha nia sanak sira nia mahan”.    

Evangelho Domingo semana nee, Jesus hanorin kona ba Reino Maromak nian compara hanesan ema nebe kari fini iha rai no hanesan mos mostarda musan ida nebe atu kuda iha rai, nia mak musan kiik liu hotu iha rai. Maibé, kuda tiha hahu moris, sai boot liu hotu modo sira iha toos laran, hodi soe tahan mesak bobot nebe manu sira lalehan nian bele hamahan-an iha nia mahan.

Liu husi aiknanoik ida nee Jesus hakarak hanorin deit ita katak fini nee rasik mak  Maromak futar lia sira nebe ita Nai Jesus Cristo hanourin mai ita liu husi Nia doutrina sira iha Sagrada Escritura; tan nee, nudar sarani ita precisa hakbesik-an ba iha Igreja hodi rona Maromak nia futar lia atu nunee, ita bele prática liafuan hirak nee iha ita nia moris. São Paulo rasik mos hateten iha nia carta ba sarani sira iha Roma nunee:“Fiar mai husi buat nebe rona tiha, no buat nebe rona tiha mai husi Cristo nia liafuan”“Portanto, a fé surge da pregação, e a pregação surge pela palavra de Cristo”(Cf. Rom.10, 17); basá, liu husi Na’i Maromak nia liafuan sira nebe ita rona mak bele loke ita nia neon no fo roman ba ita nia moris aban bainrua nian no lori ita ba hetan moris ida rohan laek hodi haksolok hamutuk ho Aman Maromak iha lalehan. Tan nee, se ita hakarak hetan moris ida rohak laek nee, ita precisa husik ita nia kan sira, gosto isin nian hodi moris tuir ukunfuan Maromak nian hodi muda ita nia moris sira nebe lori ita ba nakukun; tan nee mak São Paulo rasik mos hateten iha nia carta ba sarani sira iha Roma dehan:“Keta halo tuir mundo ohin nee nian maibé, nakfila-an hodi hafoun imi nia hanoin, atu imi bele hatene lolos buat nebe Maromak hakarak, buat nebe diak, bele simu no loos”//“Não vos acomodeis a este mundo. Pelo contrário, deixai-vos transformar, adquirindo uma nova mentalidade, para poderdes discerner qual é a vontade de Deus: o que é bom e lhe é agradável é perfeito”( Rm.12,2).

Liu husi São Paulo nia carta ida nee hakarak dada fali ita nobun nia hanoin katak wainhira ita hakarak hola parte iha Reino Maromak nian, ita buka atu banati tuir Jesus Cristo nia hanorin sira nebe mak rai hela ba Nia Apóstolo sira iha mundo nee. Basá, Jesus rasik hanesan mostarda musan ida nebe kuda iha rai, moris mai fo mahon ba manu sira lalehan nian. Iha Evangelho São Mateus nian mos hateten katak:“Hanesan Oan Mane mai, laos atu ema serbi Nia, maibé, atu serbi no saran nia moris atu soi ema barak”//“O Filho do Homem não veio para ser servido, mas para servir e dar a sua vida para resgatar a humanidade.”(Cf.Mt.20,28).

Maromak nia oan mak ita nobun nebe agora daudauk peregrino iha mundo nee hodi halao ita nia actividade sira tuir liberdade nebe Maromak haraik ona mai ita ida-idak; maibé, ema nebe hola parte iha Reino Maromak nian mak ema sira nebe simu ona we baptismo no rona Maromak nia Futar liafuan hodi moris tuir. Tan nee, se ita hola parte iha Reino Maromak nian mak ita sei moris tuir Nai nia ukunfuan sira iha ita nia moris. Primeira carta João nian hateten mos katak: “Nunee mak ita hatene katak ita hadomi Maromak nia oan sira: wainhira ita hadomi Maromak hodi halo tuir nia ukunfuan sira; basá ita nia domin ba Maromak nee: katak ita halo tuir nia ukunfuan sira. Nia ukunfuan la susar mai ita”//“É por isto que reconhecemos que amamos os filhos de Deus: se amamos a Deus e cumprimos os seus mandamentos; pois o amor de Deus consiste precisamente em que guardemos os seus mandamentos não são uma carga”(Cf.1Jo. 5,2-3).

Wainihira ita simu Sacramento Baptismo hatudu katak ita hola parte iha Maromak nia Reino no ita sai Maromak nia oan. Ho baptismo nebe ita simu mak loke dalan ba ita atu hakaat tama ba Na’i Reino rohan laek nian. Iha carta Éfeso nian  mos hateten nunee: “Uluk, imi iha nakukun laran, maibé, ohin imi naroman ona iha Na’i; sai tiha naroman nia oan sira”(Ef. 5, 8).

Ohin loron ema começa hadook-an husi  Maromak tamba deit rikusoin mundo nian mak iha valor liu ba nia moris, do que fo ksolok ba klamar ho Maromak nia Futar Liafuan sira. Ida nee hatudu katak ita monu ona ba laço demónio nian. exemplo concreto mak hanesan Domingo loron santo, ema barak hakarak ba participa iha missa hodi rona Maromak nia Futar lia maibé, ema barak mos lakohi ba misa tamba sira halo buat seluk hanesan: ba passa tempo iha tasi ibun, iha hoteis sira, joga SDSB, joga karta, Bingo, conversa madrinha hodi conta deit ema seluk nia vida no sel-seluk tan. Ida nee hatudu katak ita rasik mak hasai ita nia-an husi dalan Maromak nian, hodi ba moris iha nakukun nia laran no ikus mai halo ema nia moris la hakmatek, hasoru problema, indisciplinado, libertinagem, violência, vingança, arrogância hodi fila kotuk ba Maromak.

Maibé, se ita lakohi husik ita nia hahalok aat sira nee mak iha loron ikus ita sei hatan iha Maromak oin hanesan São Paulo hakerek nia Segunda carta ba sarani sira iha Corinto hateten katak:“Basá ita hotu sei mosu iha Cristo nia tribunal, atu ita ida-idak bele simu nia kolen diak eh aat, tuir hahalok nebe ita halo iha isin”//“Com efeito, todos havemos de comparecer perante o tribunal de Cristo, a fim de que cada um receba conforme aquilo que fez de bem ou de mal, enquanto estava no corpo”(2Cor.5,10). No Jesus rasik justifica hodi hateten iha Evangelho São João nian katak: “Ema la horik iha Ha’u karik, ema sei soe nia ba liur hanesan ai sanak; nia sai maran no ema sei futu hamutuk ai sanak sira nee hodi soe ba ahi, no ahi sei han sira”(Cf.Jo.15,6).

Se ita hakarak hola parte iha Reino Maromak nian, uluk liu ita buka moris tuir ita  Jesus Cristo nia hanorin sira, Atu nunee, liu husi Nia hanorin hirak nee, ita bele prática iha ita nia moris tomak hodi muda ita nia hahalok aat sira ba moris ida nebe diak basá, refrão husi Aclamação nebe ohin ita rona hateten mos katak:“Fini mak Maromak futar lia, Cristo mak ema nebe kuda; ema hotu nebe hetan Nia, hetan moris rohan laek”. Bem Haja/ Roménio.





Komentario :


Prense Komentario :
Naran :
Website :
Komentario
 
 (Hatama kode 6 iha leten)

 

Notisia Seluk

CONSELHO IMPRENSA INFORMA SERVIÇO BA PRESIDENTE DA REPÚBLICA

RTKNews,(edição Sexta-Feira 16/03/2018); Dili-Presidente Conselho Imprensa/ Virgilio da Silva ...

EX-PRIMEIRO MINISTRO LANÇA PLANO AÇÃO NACIONAL RESOLUÇÃO CONSELHO SEGURANÇA ONU 1325

RTK News, edição Sexta Feira 21-10-2016 :  Primeiro Ministro Rui Maria de Araújo Quinta feira nee ...

CHAMADA HODI CESSAR-FOGO IHA FUNU IÊMEN NIAN, WAINHIRA LIUTIHA BOMBARDEIO

RTKNews,(edição Terça  Feira 18/10/2016);Dili-SBS World News Radio: ...

ATAQUE CONTRA ACAMPAMENTOS ISIS NIAN, LAOS HO VINGANÇA

RTKNews,(edição Terça  Feira 18/10/2016);Dili-Rádio ...

Programa Seluk

RONA NO HALO TUIR

HAU NIA INAN NO MAUN ALIN SIRA MAK; SIRA NEBE RONA NO HALO TUIR MAROMAK NIA LIAFUAN  (Husi ...

“JESUS MAK PAO MORIS”.

Belun Católica doben sira hotu, ohin ita tama ba domingo sanulu resin-sia tempo  ...

“EMA NEBE HAN AI-HAN NEE, NIA SEI MORIS BA NAFATIN”

LEITURA NO REFLEXÃO BA DOMINGO XIX TEMPO COMUM Primeira Leitura Lia hosi Livru Liurai sira ...

HAU MAK AI-HAN MORIS NIAN, EMA NEBE HAKBESIK HAU, NIA SEI LA HAMLAHA TAN; EMA NEBE FIAR IHA HAU, NIA

HAU MAK AI-HAN MORIS NIAN, EMA NEBE HAKBESIK HAU, NIA SEI LA HAMLAHA TAN; EMA NEBE FIAR IHA HAU, ...

IMI BUKA HAU, ...TAN IMI HAN PÃO TOO BOSU DIDIAK

LEITURA BA DOMINGO XVIII TEMPO (COMUM) BAIBAIN. Primeira Leitura: Lia housi Livro Êxodo (Ex ...

Hit Counter

Visita Ohin Loron : 505
Total Visitor : 1496423
Hits Ohin Loron : 3491
Total Hits : 10648252
Online Hela : 3