.:Radio Timor Kmanek Lian Nain Feto
.:: 2017 Tinan Sagrada Escritura : Moris Ba Biblia, Iha Biblia, Ho Biblia, No Husi Biblia ::.


Programa Detalho

NACIONALISMO: HADOMI RAIN-HADOMI NAÇÃO

Image 03

Ex presidente Estados Unidos da América; John F Kennedy iha ninia discurso político dehan; “LA BELE HUSU SAIDA MAK NAÇÃO HALO BA O MAIBÉ, HUSU SAIDA MAK O HALO BA NAÇÃO”. Timor Leste loke página foun 2015 nian ho tragédia; conflito Arte Marciais iha Município Baucau. La kleur deit ex-comandante Mauk Moruk hakanek liu tan esperança tinan foun nian ho ataques no dentenção ba PNTL iha Saelari-Baguia. Tama fali mai iha cidade Dili nian, impacto conflito Arte Marcias iha Baucau obriga Primeiro Ministro; Xanana Gusmão tende halo juramento ba membros F-FDTL ho PNTL sira iha palácio do Governo atu husik sira nia grupo arte marciais no saran-an liu ba serviço ba interece Estado RDTL.

            Iha circunstâncias hanesan, isu Romodelação ka Reestruturação sai rame liu tan. Iha média sira nia página notícia inclui mos lia conta husi ibun ba iha sociedade laran, temi Remodelação. Fihir ba acontecimento hirak nee; ema balu interpreta katak; iha entidades balu hamrik iha evento hirak nee nia kotuk. Matan dook balun tan siik dehan; Ministro no Secretário Estado balun mak suporta acontecimento hirak nee tan sira moe atu sai vítima ba plano Remodelação EX-Primeiro Ministro Xanana Gusmão nian. Husi sikun seluk tan dehan: nação boot balun mak suporta Mauk Moruk cria instabilidade rai laran tanba CNRT no FRETILIN colabora hamutk ona hodi desenvolve nação ida nee. Nunee, la iha tan leet ba interece político estrangeiro nian hodi cria instabilidade iha Timor Leste. Ita mos seidauk haluha analogia indonésio nebe dehan: DIMANA ADA GULA DISITU ADA SEMUT. Riku soin Timor nian halo interece barak hakarak sobu unidade Timor Oan nian atu sira mai aproveita Timor nia Rico-soin inclui mos religião falso sira ou Seita/sekte balu. Osan Dollar nebe circula iha Timor laran atrai tebes feto prostituta internacional no local sira namtate mai Dili lori mo ho moras HIV/SIDA.

Território Timor nebe la dun controlado  hanesan área marítima no fronteira sira, halo ema fácil naok ikan no halo transacção DROGA no Tráfico Humano. Ita imagina took, bainhira mak Timor desenvolve ba oin se conflito rai laran mosu la para hela deit? Ita mos imagina took se Timor oan hotu contamina moras HIV/SIDA (AIDS)? Ita mos hanoin took se Timor oan maioria sai DROGADO, rai TIMOR nia futuro sai oinsa loos? Too ponto ida nee,  ema seluk sei hamnasa hahaek hodi hatama kanuru tohar iha ita nia problema sira.

             Fihir ba acontecimento hirak nee, ita considera ONG CEPAD nia resultado pesquisa nebe dehan; conflito sira iha Timor Leste mosu la horas tanba Timor oan coloca interece partidos no grupo aas liu interece Nacional. Mentalidade ida nee loke dalan atu ema seluk soran ita. Biban ida nee, ita sei foca liu reflexão ba ponto principal rua; Panorama Histórica no Nacionalismo nia duracão.

            Panorama Histórico: Sei namanas hela oinsa maka atu halo desenvolvimento ba Nação nebe foin ukun rasik-an; hateke ba história Timor oan sira iha tempo hirak liu ba, fortemente Timor oan hotu metin los iha espírito Nacionalismo ho liafuan MATE KA MORIS UKUN RASIK-AN. Nacionalismo homan duni iha Timor oan sira nia isin lolon tomak hodi lema; AMI ISIN MAUBERE KLAMAR MOS MAUBERE. Espírito nee mai kedas husi Lider Político sira too povo ai leba, husi kedas matenek nain sira nebe labele la hakerek too sira nebe laran makerek. Iha ponto ida nee maka ita dehan Nacionalismo ida que puro hanesan Karl-Heinz Peschke SVD define iha ninia livro Etika Kristiani koalia kona ba; Dever Moral iha sociedade hodi compila ideia central Bispo F.R Bornewasser nia liafuan katak : haksolok ba ho desenvolvimento rai doben, nia hulan terus sira no harohan hela deit ba nia problema sira.Liutan nee, hakarak define lia fuan NACIONALISMO katak: AMOR PELA PÁTRIA/ Hadomi ita rai. Ida nee dever lulik ida ba ema hotu nebe hakat ain iha rai Timor nia hitin.

Husi hanoin lerek sira iha leten, ita bele hahu hodi dehan Nacionalismo Timor oan sira nian hodi hatudu sira nia domin iha processo ukun rasik-an ita hotu la dúvida. Husi kedas tempo funu nain Timor luta iha ailaran, Nacionalismo ida metin iha fuan hodi hadomi no mate ba Timor. Biar invasor Indonesia halo intimidação, halo violência, halo torturação fidelidade ba Timor Leste metin nafatin: “ Isin, Ruin, Ran, no Klamar Timor”. Nacionalismo ida nunee lamuda no la bele naksobu husi anin boot no laloran Militar Indonesia nian, hetok lian “ mate ka moris ukun rasik-an” sai hanesan ahi lakan hodi sunu ema hotu nudar Timor nia oan.

Liu tiha tempo naton atu halo reconstrução ba Nação RDTL tamba foin mak liu deit husi tempu destruição ida, Timor Leste nia oan sira hahu kahe kbaas ba malun, lolo liman ba malun hodi repete liafuan Nacionalismo “mate ka moris UKUN RASIK ITA RAIN” Timor sira nia Nacionalismo ema seluk la dúvida, Timor hisik kosar been no ran, tane as soberania nação RDTL nian hodi hari nação nee iha ran no ruin nia leten, sura nunee tamba sira nia mate maka RDTL nia moris, Sira nia mate povo Timor ksolok hodi hatutan ho is moris hodi hadia diak liutan Timor Nia ukun Rasik-an. Povo Timor homan ona mundo iha terceiro milenio ho nação foun ida ho naran RDTL; ho nia Presidente da República, Parlamento Nacional, Tribunal no Governo rasik tuir mata dalan constituição nian. Isapan Jempol lubuk ida namtate husi ema sira iha mundo nia sorin balu, hatoo sira nia sentimento orgulho, hatoo sira nia haksolok ba povo Timor, povo Timor mout iha domin klean ba Rai doben RDTL nebe sukat ba nia as hanesan lalehan ho rai, ninia klean tama borus fuan. Haksolok ida oinsa nee. Afinal, hamutuk ita mos bele.

Nacionalismo nia Duração: Nacinalismo nia duração ita bele sukat? husi lia makhusuk nee ita bele descreve situação balun nebe halo ita oin hadubuk ba rai, diak liu tau rai rahun iha ita nia-an hodi nunee labele hetan tan Nacionalismo iha Timor nia oan sira, ita hatene katak foin mak liu deit cerimónia restauração Indepêndencia, foin deit momento haksolok ida, kala sukat ba mai tinan lima nia laran Timor oan sira haklean fali ba lunturu hodi toba fali iha  lona nia okos, condição haksolok nebe foin ku’u mohu nabeen iha ukun metan Timor oan sira nia hahalok, mosu crise militar nebe Nacionalismo no Patriotismo iha hela slogan “ lorosa’e no loro monu nia tolan”. Conflito arte marciais nebe liafuan mate ka moris ukun rasik-an sai fali “ mate ka moris PSHT, KORK, IKS, KOLIMAU 2000, BUA MALUS, 77, 12/12, 55, no sira seluk tan nebe ita bele temi naruk hanesan ladanha. Husi sikun seluk mos, ita haree katak veterano sira balun, hetan ona apreciação ba sira nia luta hodi hetan pensão vitalícia, mate ka moris ukun rasik-an sai fali “ mate ka moris pensão vitalicia. Husi sira nee balun hetan lerek biban hodi gere orçamento estado iha projeto sira, nunee mate ka moris ukun rasik-an sai fali mate ka moris projeto nunee sira halo competição iha projeto hodi hadau malun projeto. Mosu tan mai hamanas ita nia tilun; grupo KRM nebe lidera husi Mauk Moruk; Nacionalismo ninia sasukat hanesan los lixo ona tamba ikus-ikus nee KKN mak mosu malorek iha governantes sira; nunee mate ka moris ukun rasik-an sai fali mate ka moris aproveita naok lai. Cidadão Timor nia sentido de possuir/sense of belonging/rasa memiliki mihis liu tiha kedas nunee, mate ka moris ukun rasik-an sai fali mate ka moris goja Liberdade. laos nee deit, sei iha tan ida seluk nebe halo moe too halo nacionalismo nia iis kotu salsala tamba moris moral liderança nação nian balu buka deit gosto. Tamba nee, mate ka moris ukun rasik-an sai fali mate ka moris gosto lai no ninia consequência povo kiik sira tutur todan iha sira ulun, hulan iha kbaas, rai nonok moe sira iha fuan hodi hateke Nacionalismo nebe atu hela deit naran.  Atu keta lalos karik ita bele nota husi acontecimentos lubuk ida hanesan tuir mai :

Ba dahuluk; Nacionalismo (hadomi nação) mihis kedas iha tempo ida, iha nebe militar sira tama klean tiha iha slogan lorosa’e vs loromonu nebe hori uluk hori wain Timor Lorosa’e maka kesi hamutuk hodi luta ba ukun rasik-an, ninia consequência ita bele haree rasik ho matan, sente rasik ho ita fuan nebe tragédia nee nia iis ita sei horon too oras nee. Iha nee ita hahu husu Nacionalismo loloos maka ida nebe ???

Daruak: foin liu deit husi acontecimento sabraut ida mosu tan kbiit foun ida nebe Timor oan rrasik mak sai nudar autor hodi hahu hatudu liman ba malun, foti kroat hasoru malun, tuba malun iha dalan. Iha nee ida-idak loke hirus matan hatudu ba malun, too ida nebe pior liu Timor nia oan sira oho malu fali, compara karik rai doben Timor quase atu hanesan manutolun iha karau dikur tutun, atu monu salsala ba ema nia manobra. Hahalok ida nebe tuir loloos la acontece iha Timor nia ukun rasik-an. Dala ida tan, Liafuan Nacionalismo nian; “ Mate ka moris ukun rasik-an sai fali mate ka moris grupo/partido maka diak liu. Nunee, la iha ona imparcialidade, iha serviço sira, descriminação mosu nabnaban hodi defende grupo. Hetok aat liu ordem estado nian mos la folin ona iha sira nia matan hodi halao actividade illegal sira, la simu sira nia salan hodi koalia hasoru estado. Timor oan nia nacionalismo iha nebe ???

Datoluk: princípio política ida nebe ninia hun no abut ita atu haluha lakon ona. Ida-idak mosu mai ho nia interece, ida-idak mai ho nia sentido ukun rasik-an ida hodi sura kolen ba malun, hahalok ida nebe tuir loloos la soin mosu iha ukun rasik-an no diak liu hahalok sura kolen diak liu hatama tiha ba lixo.

Tamba sura kolen ba malun hakarak hetan pensão vitalícia, ida nee maka contribuição ba rai Timor uluk no agora. Nacionalismo nudar Timor oan hela deit iha competição projeto nia leten, mout lakon iha osan no osan nia ukun. Uluk funu nain ba Timor hodi haktadak mate ka moris ukun rasik-an, ohin loron “mate ka moris renke hetan  projecto”.

Dahaat:hau nia kakutak mos hanoin hetan kona ba Timor Leste hein hela aman diak sira, hirak sira nebe ita bele konta ho sira nia sacrificio, aman diak sira nebe halo política iha nação no hatur formulação ida kona ba povo nia hakarak, keta mehi  deit iha povo nia mehi tamba se lae ita hela hotu iha mehi nia leten. Kona ba nee maka Karl-Heinz Peschke SVD fortifica diak liutan katak “ Estado no Política tende formula saida mak sociedade hein hela”. Aman sira nebe ohin loron halo política ba povo nia diak habosu deit kabun mak barak hodi husik hela ukun metan kiak nian toba hamutuk ho povo kbiit laek sira. Aman sira nia hahalok ohin loron mout iha gosto nia leten, hodi halo deit mak KKN husi ministerio ida ba ministerio seluk, moris moral aman doben sira nian mos sabraut, tamba  sira nee halo ita oin naburut, tau fodik sira nia moe iha ita nia fuan. Nacionalismo nudar Timor oan hodi hadomi nação nee iha nebe ona?

Dalima: Ita nia Nacionalismo nudar Timor oan mout lalaok suam-suam kuku (Indiferença/acuh tak acuh) hodi hateke deit husi dook saida maka atu acontece ba nação. Buat simples nebe ita bele haree mak bainhira hasae bandeira Nacional iha cerimónia boot hanesan : 28 de Novembro, 20 de Maio, 30 de Augusto no loron sira seluk tan, povo sente baibain deit iha momento hasae bandeira, lao ba mai bainhira coro sira hananu hino Nacional, tesi lia hodi hamnasa halimar iha tempo ema hotu iha recinto laran halo hela continência ba bandeira, estudante barak, universitário lobuk inclui mos funcinário barak la hatene hananu Hino Nacional. Ita nia Nacionalismo hanesan Timor oan iha nebe ? merece ka lae estabelece educação cívica no moral religião?

Daneen: laos hanesan lia anin lori maibé, los duni, ikus-ikus nee mosu CRM (Conselho Resistência Maubere) hodi contra estado no cria instabilidade. Existência CRM nian mos ita questiona, saida mak iha kotuk, sira nia presença atu halo diak ka halo aat, sunu kareta policia nian nee significa condena corrupção ka lae? sira mai atu sura kolen ba Timor nia ukun rasik-an karik? Pior liu tan, entidade estado balu hola parte hatama no protege feto prostituta sira mai Timor. Seluk tan colabora subsubar ho agente bandar DROGA sira inclui mos ANAK MAS Governo nian balu. Hadomi Timor Leste mak hanesan nee ka? Nacionalismo hanesan Timor oan hela deit naran ona karik?

Atu taka escrito nee, atan hau hakruk oin hodi husu deit leitor sira nia compreenção atu ho laran tomak ita hateke fila fali ba ita nia-an, tama fali ba ita nia fuan, tamba ukun-an nee dalan ida naruk tebes. Ema wain hikis susar no ran ba rai lulik nee. Horas too ona atu ita hadom Timor ho fuan. Ita nia Nacionalismo namihis tan dalaruma  educação cidadania nebe kuran liu, dalaruma mos ita la hatene atu halo saida ba nação no povo nia diak. Ho hanoin ida nunee, diak liu ita banati heroi/matebian sira nebe mate ona ba rai nee.

Tamba sira nee prontidão mate ba nação too ukun rasik-an expressa prova sentido Nacionalismo. Nusa mak ita sira ohin loron la bele mate ba nação nia desenvolvimento?.

            Kmanek liu tan wainhira ita hatudu hirus matan hasoru desenvolvimento hodi combate DROGA, PROSTITUICÃO, CORRUPÇÃO, RELIGIÃO FALSA do que hatudu hirus matan hasoru fali maluk Timor oan sira. Hori uluk, hori wain Timor oan mesak maun-alin, bin-feton no nan nian deit. Diak mos ba ita atu halo diak hodi kumu liman hasoru inimigo foun nebe mai atu aproveita ita nia riku-soin do que ita mesak Timor oan deit maka hatudu liman ba malun. Ita seidauk moe tamba governo iha mundo nee, so Timor nia governo deit maka lakon justiça iha rain rasik. Ita hatudu ita nia Nacionalismo too iha nebe ???

Hanoin kona ba Nacionalismo hau hakarak hatur liafuan ikus husi discurso presidente John F. Kennedy iha cerimónia tomada de posse iha fulan Janeiro tinan 1961 nebe dehan: “rekan-rekan semua warga negara Amerika, jangan menanyakan apa yang dapat diperbuat oleh Negara bagimu- tapi tanyailah dirimu sendiri apa yang dapat kau perbuat bagi negaramu. // la bele husu saida mak nação halo ba o maibé, husu ba o nia- an saida mak o halo ba nação.

            Buat nebe ita sei halo iha contexto Timor nian mak; homan hadia fali ita nia sentido Nacionalismo hodi hateke loron aban nebe sei mai, hodi hakerek iha reen toos, mate mohu, soe isin lemo-lemo. Ruin naklekar tan hau rai doben. Sentido Nacionalismo (Hadomi Timor Leste) sai hanesan história nebe sei conta ba otas foun sira. ita nobun tuba ba oin, hatudu Nacionalismo atu keta hetan deit tolok no tolok wainhira ita nia oras mate nian too. Nacionalismo horseik, Nacionalismo ohin no Nacionalismo ba nafatin maka : Mate ka moris ukun rasik-an, Mate ka moris halo diak ba nação, mate ka moris Timor maka ita nia rai”. Se laos agora, bainhira tan- se laos ita se tan?*** Ario Tauros/Ignas Lopes.

 





Komentario :


Prense Komentario :
Naran :
Website :
Komentario
 
 (Hatama kode 6 iha leten)

 

Notisia Seluk

CONSELHO IMPRENSA INFORMA SERVIÇO BA PRESIDENTE DA REPÚBLICA

RTKNews,(edição Sexta-Feira 16/03/2018); Dili-Presidente Conselho Imprensa/ Virgilio da Silva ...

EX-PRIMEIRO MINISTRO LANÇA PLANO AÇÃO NACIONAL RESOLUÇÃO CONSELHO SEGURANÇA ONU 1325

RTK News, edição Sexta Feira 21-10-2016 :  Primeiro Ministro Rui Maria de Araújo Quinta feira nee ...

CHAMADA HODI CESSAR-FOGO IHA FUNU IÊMEN NIAN, WAINHIRA LIUTIHA BOMBARDEIO

RTKNews,(edição Terça  Feira 18/10/2016);Dili-SBS World News Radio: ...

ATAQUE CONTRA ACAMPAMENTOS ISIS NIAN, LAOS HO VINGANÇA

RTKNews,(edição Terça  Feira 18/10/2016);Dili-Rádio ...

Programa Seluk

RONA NO HALO TUIR

HAU NIA INAN NO MAUN ALIN SIRA MAK; SIRA NEBE RONA NO HALO TUIR MAROMAK NIA LIAFUAN  (Husi ...

“JESUS MAK PAO MORIS”.

Belun Católica doben sira hotu, ohin ita tama ba domingo sanulu resin-sia tempo  ...

“EMA NEBE HAN AI-HAN NEE, NIA SEI MORIS BA NAFATIN”

LEITURA NO REFLEXÃO BA DOMINGO XIX TEMPO COMUM Primeira Leitura Lia hosi Livru Liurai sira ...

HAU MAK AI-HAN MORIS NIAN, EMA NEBE HAKBESIK HAU, NIA SEI LA HAMLAHA TAN; EMA NEBE FIAR IHA HAU, NIA

HAU MAK AI-HAN MORIS NIAN, EMA NEBE HAKBESIK HAU, NIA SEI LA HAMLAHA TAN; EMA NEBE FIAR IHA HAU, ...

IMI BUKA HAU, ...TAN IMI HAN PÃO TOO BOSU DIDIAK

LEITURA BA DOMINGO XVIII TEMPO (COMUM) BAIBAIN. Primeira Leitura: Lia housi Livro Êxodo (Ex ...

Hit Counter

Visita Ohin Loron : 382
Total Visitor : 1546485
Hits Ohin Loron : 1134
Total Hits : 10954033
Online Hela : 5