.:Radio Timor Kmanek Lian Nain Feto
.:: 2017 Tinan Sagrada Escritura : Moris Ba Biblia, Iha Biblia, Ho Biblia, No Husi Biblia ::.


Programa Detalho

NIA(PEDRO) TAMA BA RATE LARAN HODI HAREE HENA SIRA NAMKARI IHA RAI (JO 20, 6)

Image 03

«NIA(PEDRO) TAMA BA RATE LARAN HODI HAREE HENA SIRA NAMKARI IHA RAI » (JO 20, 6)

(Reflexão ba Domingo Ressurreição 2015)

Festa páscoa mak festa boot liu hotu iha istória Igreja Cristã Católica nian basá, iha festa nee, Cristão hotu hotu hanoin fila fali Nai Jesus Cristo nia moris hias husi mate. Igreja Católica Timor Leste comemora festa moris hias Cristo nian nee ho sentimento laran triste tan lakon ona Bibi atan diak: Dom Alberto Ricardo da Silva. Nai Maromak bolu Dom Alberto Ricardo da Silva iha los momento han kalan ikus nee. Nunee, sura ho Cristo nia moris Hias, horas nee. Dom Alberto haksolok ona iha Nai Maromak nia reino Lalehan.

Hanoin Jesus nia moris hias, loke espaço ba ita ema nia esperança basá, Jesus Cristo nia ressurreição transmite ksolok, inspira confiança, dudu aten brani no sai hanesan we matan Paz nian. Cristão Católico hothotu simu Cristo nia moris hias ho ksolok vitória nian. Cristo mate atu ita moris fali, Cristo harik-An atu ita aprende haraik-an husi Nia hafoin ita sai riku iha Maromak nia graça, Cristo obedece ba Aman Maromak nia hakarak atu ita hatene banati tuir lalaok kmanek hirak nee no hamutuk ho Cristo nia moris hias, ita ba hasoru ksolok rohan laek iha Maromak nia graça nebe suli la nahas ba ita nia moris.

Ilustração: Haktuir katak Igreja paroquial boot ida iha cidade tasi balun ba, mamuk lorloron no iha loron boot, loron Domingo mos mamuk tanba sarani barak nunca mehi atu ba missa. Sarani sira nebe mai missa, mesak katuas, idosos sira no ferik faluk sira deit mak mai tuir missa. Iha Domingo no loron boot sira, ema barak mak ba han hemu husi uma ba uma, halo festa sabdo kalan iha sira nia uma, balu ba nonton jogo futebol, inan-aman balu lalin sira nia oan ba celebra Domingo hodi passeio iha tasi ibun, Katuas oan lori sira nia oan ho ferik oan mai missa maibé, sira la tuir missa hosi fila fali mai uma, jovem sira nakonu iha bola guling iha mate uma. Jovem seluk tan lalin-an ba iha ema nia festa koremetan sábado kalan. Sira dança haluha rai too fila Domingo raihun mutin, Jovem balu preocupa liu halai motor ba mai hodi perturba ema seluk nia descansa. Família balun nia oan sira, bou-an hamutuk iha televisão oin, balu iha rental play station oin, seluk ba nani tasi do que ba tuir catequese no participa iha missa Domingo no loron boot. Sarani sira nebe fiel mak sempre mai missa. Jovem sira balu, mai missa laos ho intenção missa maibé, mai hodi hasoru malu ho namorado eh namorada. Jovem balu tan, liman book telemóvel iha missa laran do que rona leitura sira.

Hasoru realidade hanesan nee, Amu pároco mos sente frustrado ho mentalidade sarani sira nian nebe hanesan lolos ema jentiu. Amu pároco hanoin atu taka deit ona paróquia nee tanba nia usa ona dalan oioin hodi convida sarani sira mai missa maibé, la iha ema ida mak rona hodi halo tuir. Amu katuas nee fera ulun atu nunee, ema hirak nee bele sai sarani católico diak maibé, barak biu ibun hodi hetok-an dook liu tan husi sira nia vida nudar ema sarani.

Koalia tiha ho amu Bispo kona ba problema nee, iha sexta feira santa, amu pároco aviza ba sarani sira iha Igreja no liu husi Radio no Televizaun katak iha Domingo ressurreição, além de celebra missa domingo pascoa, sei realiza mos missa requiem ida iha paróquia nee. Rona informação nee, sarani sira hahu husu ba malu; mais ou menos missa requiem nee atu dedica ba se? Ema se mak mate karik e? Sarani balun hahu murmura hodi dehan; amu nee, iha loron boot hanesan nee mos bele celebra fali missa requiem nee. Balun tan bisbisu dehan: amu nee la respeita liu loron boot.

Lalais deit informação nee espalha ba ema barak. Iha domingo rai hun mutin, sarani atus ba atus, husi labarik kiik, jovem no ema adulto sira, hothotu nadodon no lalin-an mai Igreja. Balu lori lilin, balu lori ai-funan, seluk tan lori envelope tau osan oitoan iha laran. Sarani sira mai participa iha missa nee tanba sira mos hakarak hatene missa requiem nee dedica ba matebian nebe los. Iha Domingo dadersan molok raihun mutin hela, música requiem nian mos lian dadaun husi autofolante Igreja nian. Lao tama ba Igreja laran, sarani sira haree caixão ida hafalun metin ho tais metan, hatuur hela besik iha altar oin maibé, sarani sira la hatene matebian nebe mak toba hakmatek iha caixão laran basá, durante loron hirak nia laran, sarani sira la rona ema ruma mate.

Missa hotu tiha amu, pároco loke caixão no fo lisença ba sarani husi kiik too boot, hothotu forma nadodon, hafoin idaidak hakbesik-an ba caixão hodi haree ba caixão laran. Haree no hatene tiha se mak toba hakmatek iha caixão laran, sarani sira começa murmura, balun bisbisu ba malu, balu nervoso, balu fali nonok hakruk deit tanba iha caixão laran nee mamuk, buat ida la iha. Iha caixão laran, Amu pároco so tau deit espelho naruk ida iha caixão nia laran atu nunee, sarani idaidak wainhira liu husi neba fihir fali deit sira nia oin iha caixão laran nee.

Wainhira missa atu remata, amululik hameno dehan: sarani doben sira......! agradece wain tanba imi hiit-an ona mai hakonu ita nia Igreja kmook ida nee.  ohin loron, ita celebra misa Domingo da Ressurreição nomos ressurreição ba Igreja paroquial ida nee tanba imi hothotu moris hias ona husi ita nia hahalok baruk ten sira, hahalok aat sira, halaok tolok dor sira, hahalok selingkuh sira, hahalok corrupção sira, nomos hahalok aat sira seluk tan.

Ita hotu espera katak hahu ohin ba oin, Igreja nee sei la mamuk tan hanesan caixão mamuk nebe ohin imi fihir rasik imi nia oin iha laran. Hau mos hein katak hahu minuto nee ba oin imi laos ona sarani fiar mamuk hanesan caixão mamuk maibé, imi sai ona sarani nebe nakonu ho espírito/semangat moris hias nian tan imi nia fiar moris hias ona hamutuk ho Cristo nia moris hias.

Adapta husi revista CRUZADA, junho 2010, p.11-12.

 

Cidade Dili no sarani Católico Timor laran, luto metan ba amu Bispo Alberto Ricardo da Silva nebe ba ona mundo seluk. Doma Alberto kal horas nee goza ona Cristo nia moris hias iha Lalehan aas neba, ao passo que sarani sira matawen turuk hela iha rai nee, tan amu Bispo husik cedo deit sarani hotu nebe precisa amu Bispo nia presença. Sarani hotu sei precisa amu Bispo nia presença maibé, talvés, Maromak iha rasik nia plano ba Dom Alberto nia nia-an. Iha Maromak nia futar oin, Amu Bispo sei hatan dehan:”Hau lao ona too rohan, hau mai saran-an ba ita, ho buat hotu nebe hau halo iha moris nee”. Hatan ba salmo nee, Maromak nudar toos nain iha lorokraik(wainhira ita mate-red) koalia ba mandor (Bispo Ricardo-red) nudar serviço nain hodi selu nia kolen(cf Mt 20,8))  ......, basá, serviço nain soin atu simu nia kolen(Mt 10,10)//(Ao entardecer, o dono da vinha disse ao capataz: ‘Chama os trabalhadores e paga-lhes o salário(cfMt 20,8)) “ (pois o trabalhador merece o seu sustento)”(Mt 10,10).

Evangelho ba Domingo Páscoa nian, conforme Evangelista são João relata katak; Nai Jesus Cristo moris hias tiha ona husi mate. Maske Evangelho la descreve lolos oinsa processo Nai Jesus Cristo nia moris hias maibé, buat nebe fo prova no fo laran metin mai ita kona ba Cristo nia moris hias nee mak; lia fuan tetemunha husi escolante sira nebe haree rate mamuk. Evangelho são João nian relata mos katak; escolante feto ida naran Maria Madalena mak hetan uluk rate iha condição mamuk, tan hateke fatuk nebe taka rate, doir tiha ona ba sorin.

Hanesan ita rona iha Evangelho são Lucas nian iha Sábado Aleluia kalan katak; Sira hetok liutan sira nia hakfodak wainhira anjo nain rua ho hatais nabilan koalia ba sira hodi dehan; “tansa imi buka iha mate sira leet, ema nebe moris hela?”. Informação ida nee ikus mai too mos iha apóstolo sira nia tilun. Maibé, tadição Judaica nian sei hafalun hela apóstolo sira nia matan fiar nian. Sa tan iha altura neba, ema barak ladun fiar wainhira feto sira fo testemunha kona ba lialos ruma.Quanto mais, testemunha husi feto sala nain hanesan Maria Madalena nebe Jesus salva iha Jerusalem wainhira ema atu tuda mate nia. Tuir mai, são Pedro halai rasik ba too rate hodi haree rasik ho matan tan nia mos la fiar saida mak feto sira nee konta ba apóstolo sira seluk. Pedro mos ikus mai justifica katak Jesus Cristo moris hias duni ona tan iha rate laran, nia hetan deit mak ligadura sira maibé, Jesus nia isin mate la iha ona.

Buat nebe mosu iha Maria Madalena nia kakutak mak: ema naok tiha ona Nai Jesus nia isin,  no pior liu tan, apostólo sira seluk mos fiar tuir deit buat nebe Maria Madalena haktuir ba sira. Tanba nee mak iha Evangelho, são João fo tada katak “sira neon seidauk nakloke ba Lia Escritura nian katak; Jesus sei moris hias duni husi mate (Jo 20,9).” Apóstolo sira, maske horik hamutuk ho Jesus durante tempo barak maibé, sira seidauk compreende loloos buat hotu nebe Jesus koalia antes tiha ona kona Ninia terus, mate no moris hias. Maske Maria Madalena mai haktuir ba Apóstolo sira katak ema naok tiha ona Jesus nia isin mate husi rate maibé, buat nee la iha prova basá, hena nebe falun Jesus nia isin mate latan naklekar hela iha rate laran. Se ema naok duni Jesus então naokten hirak nee mos tende foti ho hena nebe falun Jesus nia isin mate. São João Evangelista mos relata katak haree tiha hena namkari iha rai, apóstolo nebe halai hamutuk ho Pedro ba rate fiar duni katak Jesus moris hias tiha ona

Nunee mos ita hotu nebe reconhece-an nudar Cristão Católico, ita mos simu convite husi Cristo hodi sai mensagerio Jesus nian ba ema nobun. Ba ida nee ita koko foti exemplo husi apóstolo Pedro nebe ho aten brani hakilar hodi tatoli Cristo nia moris hias ba ema nobun dehan: ami hirak nee, Jesus Nazaré nia sasin; ami fo sasin kona ba Jesus Nazaré nia hahalok iha rai Judeia, iha Jerusalem. Nia mosu hodi han no hemu hamutuk ho ami (cf Act 10,34ª.37-43). Experiência testemunha Pedro nian nee sai mos inspirador ba ita hotu hodi la bele moe fo sasin ita nia fiar ba ema seluk liu husi hahalok caridade sira.

Istória salvação iha Testamento Tuan nian, relata kona ba processo Maromak milagrosamente, salva povo Israelita sira sai husi egipto liu husi Moises nudar figura central. Páscoa iha tradição ema Judeu sira hanaran ho lian aramaica dehan; pascha significa passa ou liu tiha ona. Ho lian seluk, páscoa ba ema Judeu sira mak relembra fila fali oinsa Maromak intervém ka campur tangan iha istória salvação hodi liberta povo Judeu husi escravidão ema egipto nian liu husi profeta Moises.

Iha Testamento Foun, ita sarani Cristão Católico sira hasoru figura central único mak Jesus Cristo. Jesus nia missão tomak lori ita ba justifica Maromak nia intervenção milagrosa hodi liberta ema fiar nain sira husi nakukun pecado nian iha Jesus Cristo nia personagem tomak. Processo Moises lori sai povo Israelita husi rai Egipto hodi hakur liu deserto durante tinan 40, fo tada hikas mai ita Cristão sira loron 40 tempo quaresma nian. Tinan 40 nudar tempo purificação, tempo hamoos-an ou pemurnian diri molok hakat tama terra prometida katak rai nebe nakonu ho susu wen no bani ben suli la nahas tuir promessa Maromak nian ba povo Israelita. Tempo Quaresma durante loron 40 nebe ita Cristão Católico hakat liu ona, nudar tempo purificação hodi prepara ita nia klamar molok celebra Pascoa, liliu Cristo nia moris hias iha nia Glória tomak. Basá, iha Cristo nia moris hias, ema hotu sei ba hetan ksolok rohan laek nakonu ho Maromak nia graça nebe suli la nahas. Graça Maromak nian nee mak horas nee Dom Alberto Ricardo simu dadaun iha Maromak nia reino Lalehan.      

Mate tuir óculo fiar sarani nian katak; muda husi vida ida ba fali vida foun seluk. Nunee mos Moris hias katak mudança de condição. Jesus rasik comprova realidade ida nee hodi haktada mai ita kona ba sentido Ressurreição nee rasik. Iha passagem Bíblica seluk descreve mos katak; moris hias tiha husi mate, Jesus mosu ba Maria Madalena no wainhira Maria nia liman hakarak kona Jesus nia futar isin, Jesus hateten;”keta kona hau nia isin tan hau seidauk ba hasoru hau Aman”. Nunee, moris hias katak Jesus nia futar isin tomak transforma ona husi condição humana ba condição espiritual-Divina. Condição ida nebe ksolok no moruk mundo nian la hafalun tan ona Jesus nia-An maibé condição ida nebe puramente divino. Condição ida nebe nakonu naresin ho Maromak nia graça.

Iha istória páscoa Cristã, Ita ema Cristão kuda metin ita nia fiar iha Cristo nia moris hias. Cristianismo hahu moris wainhira ema hotu fiar duni Nai Jesus Cristo nia moris hias hanesan realidade ida nebe hatuur ninia-an iha história ema fiar nain sira nian. Nunee, páscoa katak mistério Jesus nia paixão; terus, mate no moris hias sai hanesan base no fundamento nebe ema Cristão sira kesi metin sira nia fiar. Acontecimento pascal mak ita nia abut fiar nian basá, ita la fiar iha Jesus Cristo nebe mate hodi oin maibé, ita haburas ita nia fiar iha Jesus Cristo nebe moris hias duni husi mate atu loron ida, ita mos la bele mout klean iha mate nia ukun maibé hader fali hodi hakuak vitória moris hias nian hamutuk ho Jesus nia Moris hias.

São Pedro iha nia carta hakerek katak Cristo mate dala ida deit ba maksalak sira. Nunee, Cristo nia mate mak ita nia moris, Cristo nia terus mak ita nia Ksolok, Cristo nia haraik-an hanorin ita atu la haluha ita nia-an hanesan kriatura sala nain nebe sempre monu bebeik ba sala. Hamutuk ho Cristo nia moris hias, ita hetan ita hetan vitória hodi manan mate. São Pedru mos hatutan teni iha nia carta hodi konfirma liu tan katak we nebe ohin loron hamos ita mak we Baptismo. We Baptismo laos atu hasai foer isin lolon nian maibé, atu hetan klamar moos husi Maromak liu husi Nai Jesus Cristo nia moris hias.

Tinan 2013 liu ba, amu Papa Emérito BENTO XVI estabelece nudar tinan fiar nian ou ano da Fé ba Igreja Universal. Ano da Fé estabelece ho hanoin ida katak atu revitaliza ou hamoris fila fali  fiar ema sira nebe hanaran-an sarani maibé iha realidade sira nia fiar la iha ona. Ba mentalidade ida nee, amu Papa; Francisco dehan: perigo ba família no sociedade ohin loron mak; hahalok indiferença(cuek). Amu Papa Francisco mos termina tinan 2014 nudar tinan ba família sira basá, Papa observa katak Uma Kain Católico sira ohin loron barak mak naksobu tan deit problema selingkuh.

Ohin loron ema barak koalia hodi fo sasin katak hau ema Católico, ami família Católico maibé, dala barak liu, hahalok no lia fuan la expressa sira nia ser hanesan ema sarani Católico. Ibun kulit koalia sai fiar Maromak maibé iha prática hahalok la justifica lia fuan. Fenómeno ida nee daet hanesan virus ida nebe mosu ona iha  nasão sira Europa nian, América no ohin loron virus ida nee mos menyebar ona iha parte ásia nodi tama dadaun ona mai Timor nebe dehan quantidade populasão Maioria 95% iha certidão Católico maibé, ninia qualidade kal foin mak 20% deit Nudar sarani Católico. Amu Bispo D. Basílio mos dala ida dehan:”sarani Católico iha Timor nee mutin dala haat, metan dala ida tanba sira mutin wainhira batismu, mutin wainhira primeira Comunhão, mutin wainhira Crisma, mutin wainhira casamento too mate mak foin hafalun caixão ho hena metan hodi mai missa iha uma Kreda.

Dom Alberto Ricardo rasik wainhira sei moris, sempre koalia makas ba ita sarani sira hodi hadia vida nuudar Cristão Católico nebe diak. Ema conhecido ka ema terkenal barak,  rihun ba rihun, mosu no lakon husi história mundo nian maibe, Jesus Cristo nia istória hela ba nafatin. Jesus Cristo nebe hanesan ema sei fiar, ema sei temi no ema sei hahi-adora husi otas ba otas. Horiseik, ohin, aban no ba nafatin ema sei konta (Heb 13,8). Satanas mos consegue koko maibé, la consegue halakon Jesus. Herodes mos la consegue oho Nia. Kbiit mate nian mos la hamohu Jesus husi ema nia fiar. Rate matebian sira nian mos la consegue impede Jesus nia moris hias. Nunee, maske mundo nee bele avança lalais deit ho ninia ciência no tecnologia sira maibé, Uma Kreda nebe Jesus Cristo harii husi ninia terus mate no moris hias se la mohu nunee deit. Jesus Cristo rasik pernah hateten:”mundo nee bele liu maibé Hau nia liafuan sei la lakon wainhira seidauk hetan nia plenitude”. Jesus Cristo dehan tenik; Imi keta tauk basá “hau sei horik ho imi too mundo nia rohan”.

Nai Jesus Cristo nia moris hias hanorin saida mai ita? História badak ohin haktuir iha leten hakarak fanun fali ita nia hanoin sira hotu nudar ema sarani Católico nebe laos fiar mamuk hanesan caixão hodi haluha ita nia dever hanesan sarani maibé, mai buka hakonu ita nia moris ho Maromak nia graça hanesan ema sarani nebe hatene halo sacrifício, hatene haraik-an,  hakribi salan ba nia-an, hodi haburaas liu tan fiar no kuda metin liutan ita nia fiar iha Nai Jesus Cristo nia moris hias. Se ita nia fiar rame-rame deit então, ita nia mentalidade sei sai hanesan buat nebe profeta Isaías hakerek kona ba Maromak nia lamentação ba ema ohin loron nian dehan:” tan povu ida nee mai hakbesik ho nia ibun no hahi hau ho ibun deit maibé, sira laran dook tebes husi hau. Sira nia oração la ho fuan no laran loloos”.(Is 29,13). São Paulo mos tatoli nia carta ba sarani sira iha Colosse hodi husu sarani sira tau interece ba liu sasan leten nian (Cl 3,1 ) significa tau interce ba klamar hodi hetan netik graça ba ita nia isin no klamar. São Paulo mos hatutan liu tan iha nia carta hodi dehan; Imi moris hias ona ho Cristo (Cl 3,1). Salmista mos fo aten brani mai ita nobun hodi hakerek katak; “a mão do Senhor foi magnífica;a mão do Senhor fez maravilhas.» Não morrerei, antes viverei, para narrar as obras do Senhor. A pedra que os construtores rejeitaram veio a tornar-se pedra angular. Isto foi obra do Senhor” “Tangan kanan Tuhan berkuasa meninggikan, tangan Kanan Tuhan melakukan keperkasaan !” Aku tidak akan mati, tetapi hidup, dan aku akan menceritrakan perbuatan-perbuatan Tuhan. Batu yang dibuang oleh tukang-tukang bangunan telah menjadi batu penjuru. Hal itu terjadi dari pihak Tuhan, suatu perbuatan ajaib dimata kita” (Sl 118,16-17.22-23)

Ita nia amu Bispo Alberto Ricardo nebe horas nee, iha Lalehan aas ba, sei harohan tau matan mai ita hotu nebe horas nee, sei lao hela iha rai nee. Mai ita hakoi ita nia hahalok tuan sira ba kotuk hodi hahu moris hias ita ba hasoru loron aban hamutuk ho Cristo nia moris hias amen. ***(ILMBAFS)

 





Komentario :


Prense Komentario :
Naran :
Website :
Komentario
 
 (Hatama kode 6 iha leten)

 

Notisia Seluk

CHAMADA HODI CESSAR-FOGO IHA FUNU IÊMEN NIAN, WAINHIRA LIUTIHA BOMBARDEIO

RTKNews,(edição Terça  Feira 18/10/2016);Dili-SBS World News Radio: ...

ATAQUE CONTRA ACAMPAMENTOS ISIS NIAN, LAOS HO VINGANÇA

RTKNews,(edição Terça  Feira 18/10/2016);Dili-Rádio ...

PRESIDENTE FUNDAÇÃO GRAÇA DEUS RECONHESE RELATÓRIO PESQUIZA NEBE PÚBLICA IHA MÉDIA LALOS

RTKNews,(edição Terça-feira,18/10/2016);Dili– Relaciona ho resultado ...

TIMOR LESTE PERCISA IHA HELICOPTRE NO RO BOOT

RTKNews,(edição Terça  Feira 18/10/2016);Dili-Tersa feira nee (18-10-16) ...

Programa Seluk

RONA NO HALO TUIR

HAU NIA INAN NO MAUN ALIN SIRA MAK; SIRA NEBE RONA NO HALO TUIR MAROMAK NIA LIAFUAN  (Husi ...

“JESUS MAK PAO MORIS”.

Belun Católica doben sira hotu, ohin ita tama ba domingo sanulu resin-sia tempo  ...

“EMA NEBE HAN AI-HAN NEE, NIA SEI MORIS BA NAFATIN”

LEITURA NO REFLEXÃO BA DOMINGO XIX TEMPO COMUM Primeira Leitura Lia hosi Livru Liurai sira ...

HAU MAK AI-HAN MORIS NIAN, EMA NEBE HAKBESIK HAU, NIA SEI LA HAMLAHA TAN; EMA NEBE FIAR IHA HAU, NIA

HAU MAK AI-HAN MORIS NIAN, EMA NEBE HAKBESIK HAU, NIA SEI LA HAMLAHA TAN; EMA NEBE FIAR IHA HAU, ...

IMI BUKA HAU, ...TAN IMI HAN PÃO TOO BOSU DIDIAK

LEITURA BA DOMINGO XVIII TEMPO (COMUM) BAIBAIN. Primeira Leitura: Lia housi Livro Êxodo (Ex ...

Hit Counter

Visita Ohin Loron : 1014
Total Visitor : 1324486
Hits Ohin Loron : 3648
Total Hits : 9653566
Online Hela : 14