Quinta, 29 Outubro 2020, OTL
Breaking News

Sabadu, 13 Jun 2020, 10:24:27 OTL, 203 View Ruben Conceicao da Silva, Kategori : Igreja Local

Bainhira ita koalia kona ba reliquia St. Antonio, perguntas barak

mak mosu. Saida mak reliquia? Tamba saida mak reliquia St. Antonio

bele tama iha rai Timor Leste, liu-liu bele rai iha rai doben Fatuberliu?

Primeiru, saida mak reliquia? Reliquia signifika katak parte husi

isin lolon ou restus mortais husi Santu-santa sira no husi nia roupa ou

sasan sira no sasan ne’ebe iha relasaun ho Santu-santa sira. Iha igreja

katólika halo ona klasifikasaun tolu kona-ba reliquia sira ne’e.

Klasifikasuan ida, reliquia husi Santu santa sira nia isin lolon ou restus

mortais hanesan, ruin, nehan, fuk, liman no seluk-seluk tan. Klasifikasuan

rua, reliquia husi sasan ne’ebe Santu-santa sira uza hanesan roupa, livru

no seluk-seluk tan. Klasifikasaun tolu, reliquia husi sasan ne’ebe kontaktu

ho Santu-Santu sira hanesan uma, roupa misa no seluk-seluk tan. Iha

mundu tomak, reliquia barak mak husi klasifikasuan rua no tolu, ne’ebe

ema sarani sira respeitu los tamba sira sei sente Santu-santa sira nia

prezensa.

Tuir mai mosu pergunta ida; Reliquia St. Antonio iha Fatuberliu-

Timor Leste, tama iha klasifikasaun hira? Reliquia St. Antonio iha

Fatuberliu tama iha Klasifikasaun ida; tamba mai husi St. Antonio nia

liman fuan karuk. Iha mundu tomak, reliquia autentika ne’ebe tama iha

klisifikasuan ida hanesan reliquia St. Antonio, hetan iha fatin tolu de’it.

Primeiru, iha Padua. Iha ne’eba restus mortais St. Antonio isin tomak.

Segundu iha Lisboa, Portugal. Iha ne’eba restus mortais ruin liman

kwanan St. Antonio nian. Terseiru, iha Timor leste. Iha ne’e fahe husi

Lisboa, St. Antonio nia ruin liman fuan ikun. (hatene klaru buat ne’e bele

haree iha dokumentus no deklarasaun ne’ebe ami mos tau iha livro ne’e)

Segundu, hali nu’usa maka reliquia St. Antonio bele tama iha

Timor Leste no hela iha rai Fatuberliu? Hatan ba pergunta ne’e, ami bele

hatenten katak prezensa reliquia St. Antonio iha Timor Leste, tamba iha

relasaun metin ho prezensa frei Franciscano (OFM) iha Timor Leste.

Ordem Frades Minores ka ida be koñesidu ho naran OFM, mak

Ordem ida husi Padre no Bruder ne’ebé harii husi São Francisco de Assis

kuaze sekulo XII. Padre no bruder sira ne’ebé iha OFM nia laran koñese

ho naran bolu Irmãos Minores ka Franciscano sira. Franciscano sira nia

servisu tuir modum partikular servi ema ki’ik no sira ne’ebé ema la/nunka

tau atensaun. Obra sira Franciscano nian maioria iha area ka fatin sira

ne’ebé rural ka area sira ne’ebé antes ema la tau atensaun. Além de obra

ba sarani sira no area rural, OFM mós hetan fiar husi Igreja Roma hodi

responsabiliza ka tau matan no hadi’a ka kuidadu Igreja iha Rai Santa iha

Israel.

Ordem Frades Minores tama mai Timor Leste liu husi Indonezia.

Iha tinan 1987 tempu ne’ebé Timor Leste sei tama ba iha Indonezia, Dom

Carlos Filipe Ximenes Belo, SDB. Husu ba OFM atu hala’o nia misaun

iha Timor Leste. Lia husuk ne’e simu ho entuziazmu tebes husi OFM ho

nune’e mak iha tinan ne’eba kedas delega Frades nain tolu hodi mai hahu

sira-nia obra iha Timor Leste. Bispo fó fatin ba servisu misaun

Franciscano nian. Franciscano nain rua mak mai primeiru iha Timor

Leste naran Padre Andreas Hamma, OFM, no Bruder Willy Kotten,

OFM. Sira na’in rua (2), primeiru mai hela iha Same atu bele estuda lian

tetum. Depois mai fali ida naran Bruder Stanis, OFM. Depois iha Same,

Amo Rafael dos Santus (falc), Padre Pároco da Paróquia Same maka, lori

sira mai hela iha rai Dotik, atraves ba pedidu hosi Sr. Tito Lopes.

Iha tempu ne’ebá Sr. Tito Lopes, nu’udar Chefe do Posto

Adminístrativo Fatuberliu mos husu ba frei sira ne’ebe hela iha Dotik atu

bele ajuda hare no tau matan ba escola iha Fatuberliu, tamba ne’e Sr Tito

mos oferese ninia uma fatin Ue-Quiar atu sira bele hela. Tuir fali mai,

Padre Andre, OFM mos simu knaar ida atu sai Paroco Alas. Tinan 1992,

Padre Bonaventura Satuan, OFM mós mai no Bruder Willy Kotten,OFM,

kaer knaar ba projecto halo Convento foun ho naran “Tiga Sahabat” (

Komunitas Franciscano Fatuberliu).

Iha tinan 1993, Padre Yoseph Tote, OFM mai atu bele hela

hamutuk ho frei sira iha Convento “Tiga Sahabat”, nia mos hetan knaar

ida sai Director Escola São Francisco de Asisi Fatuberliu. Iha tinan 1994,

Padre Kornelis Keyrans, OFM mai iha Timor Leste atu bele tau matan ba

sarani sira iha Paroquia Alas. Hosi tinan 1995-1996, Estasaun Misionária

sai nu’udar QUASE PAROQUIA no Padre Andre, OFM mos halo dadaun

preparasaun ba estasaun ne’e atu sai Paroquia.

Iha loron 4 fulan Outubru tinan 1996, Amo Bispo Diocese Dili,

Dom Carlos Filipe Belo, SDB halo inagurasaun ba Uma-Kreda iha

Fatuberliu no legalmente konsidera nu’udar Paroquia foun padrueiru ba

Saun Francisco de Asis. Paroia ne’e naran Paroquia Saun Francisco de

Asis-Fatuberliu. Nu’udar Paroku no superior dahuluk ba Paroquia ne’e

Padre Andre Hamma, OFM hodi to’o tinan 1998. Husi tinan 1998, Padre

Kornelis Keyrans, OFM mai troka Padre Andre, OFM hodi tau matan ba

Paroquia Alas no Fatuberliu to’o tinan 1999. Hosi tinan 1999, Padre Andre

OFM fila fali mai continua nia knaar nu’udar superior iha Paroquia Saun

Francisco de Asis to’o tinan 2003.

Iha tinan 1997 OFM komesa hanoin ona atu loke ka kria

formação básico (Postulante) ba kandidatu Franciscano sira iha Timor

Leste. Hanoin ida ne’e realiza depois de tinan ida, hodi hahu formação

básico rasik antes kandidatu sira sai religiozo Franciscano. Fatin

formação iha Welaluhu no sei uza hela Convento OFM.

Iha tinan 2007 depois de Timor Leste ukun-an mak OFM iha

Timor Leste nakfilak-an ba fundasaun (iha nia superior rasik no iha

autonomia rasik em termos de desizaun interna) maske nune’e hanoin ba

idade ne’ebé sei jovem no rekursu humano ne’ebé seidauk naton maka

lideransa geral OFM nian hakotu katak fundasaun Timor Leste sei

responsabiliza husi OFM iha Indonezia (Provincia Santu Anjo Miguel

Arcanjo) em termos de finanças, forsa no formação ba kandidatu

Franciscano sira. Ho nune’e fundasaun Timor Leste ho nia Padroeiru ka

mahein rasik ho naran, Fundasaun St. António de Lisboa. Superior

Fundasaun hanaran Prezidente da Fundasaun. Kapíitulo geral OFM

Provinsia St. Anjo Miguel Arcanjo iha tinan 2013 no ikus hakotu lia atu

fó apoio no realiza Fundasaun St. Antonio de Lisboa (Timor Leste), ba

nia educação ka formação rasik totalmente (hahu husi Postulante to’o

Teologia) ba kandidatu OFM sira husi nasaun Timor Leste. Decizaun

ne’ebe refere foti ho sasukat ne’ebe fó sai antes ona no haforsa ho loke

formação kandidatu Padre Franciscano ba dioceze hotu iha Timor Leste.

Além- de servisu iha misaun ka Paroquia, OFM servisu mós iha area

educação ba labarik sira iha Timor Leste. Obra educação refere

lokaliza iha Welaluhu ho naran eskola São Francisco de Assis. Komesa

husi eskola básico to’o eskola secundário. OFM mós loke orfanatu ka

Colégio masculino iha Welaluhu ba estudante sira ne’ebé hela fatin dook

husi eskola. Estudante finalista balu husi eskola ka Colégio referidu iha

vokasaun no sai ona na’i lulik/ Padre Franciscano.

Padre no bruder OFM sira ne’ebé servisu iha Timor Leste hamutuk

nain-10, husi kuantidade referidu Franciscano sira ne’ebé Timor-oan

rasik hamutuk Frei na’in-5. (Frei OFM ida sei hala’o nia estudo de

especialidade iha Roma tamba prepara hela ona hanesan rekurso humano

ida atu sai formador iha futuro ba Timor Leste).

Iha loron 4 de Outobru de 2008, Amo Bispo Dom Alberto Ricardo

da Silva haraik bensa ba Convento foun frei Franciscano sira nian, ne’ebe

hela iha suku Fatucahi. Iha tempo ne’eba mos Padre Victor Milicias,

OFM, Provincial OFM Portugal tuir serimonia inagurasaun ne’e. Padre

Victor Milicias OFM mos lori buat ruma hanesan presente ida ba

Fundasaun Padre Franciscano St Antonio de Lisboa iha Timor Leste. Nia

fo presente Reliquia St. Antonio nian ne’ebe autentiku, foti husi liman

ruin St. Antonio nian rasik ne’ebe rai hela iha Basilika St. Antonio de

Lisboa. To’o loron ne’e reliquia ne’e hela hamutuk ho sarani sira iha rai

doben Timor- Leste, liu-liu iha Fatuberliu.



ARQUIDIOCESE DILI HALAO MISSA ABERTURA DA EXISTENCIA BA DALA 80
Segunda, 07 Sep 2020, 13:29:37 OTL, Le'e : 128 Dala
ARQUIDIOCESE DILI HALO TINAN 80
Segunda, 07 Sep 2020, 11:59:46 OTL, Le'e : 131 Dala
ARCEBISPO DOM VIRGILIO: PARABENS BA SARANI HERA
Segunda, 07 Sep 2020, 09:34:04 OTL, Le'e : 142 Dala

Komentariu