Sexta, 27 Novembru 2020, OTL
Breaking News

Sexta, 26 Jun 2020, 08:29:03 OTL, 312 View Ruben Conceicao da Silva, Kategori : Nacional

Opiniaun ida neé, la reprejenta Instituisaun nebeé Hau haknaár áan ba, maibe opiniaun neé hanesan espresaun pessoal nuúdar sidadaun ida, nebeé halaó knar iha Vida Jornalismu nian.

 

Hau nia opiniaun neé atu fanun, Lore oan sira, liu-liu intelektual, nivel akadémiku, no Naín ba Kompanha lokal sira nebeé durante neé kaer projetu infra-estrutura nian, atu hader, loke matan hodi hareé rasik, no lone tilun hodi rona rasik, halerik husi Lore oan sira ba Dezenvolvimentu iha Suku Lore iha periodu Ukun Rasik Áan.

 

Tópiku interesante tebes, wainhira iha diskusaun lubun ida akontese ba Estudante no Juventude husi Suku Lore I no Lore II iha Postu Lospalos, koalia kona ba Dezenvolvimentu iha Suku Lore nian, durante periodu Ukun Rasik Áan. Diskusaun neé sente triste tebes, kuandu ema hotu-hotu lekar ninia observasaun kona ba Dezenvolvimentu nebeé akontese iha Suku Lore I no Lore II l, liu-liu Infra-Estrutur Báziku hanesan Beé Moós, Estrada, no Seitor vítal sir hanesan Edukasaun, Saúde, Agrikultura.

 

Durante periodu Ukun Rasik Áan, Povo Lore oan sente moris uha situasaun inserteja nia laran ba Dezenvolvimentu Nasional, tamba la iha mudansa nebeé signifikante nebeé akontese, hodi fo haksolok ba Povo Lore oan sira. Tamba sá, tamba Povo la sente Dezenvolvimentu husi Ukun Rasik Áan neé, hanesan Povo sira seluk.

Iha opiniaun ida neé, Hau rasik la fo sala ba Governu no apoiu doador sira, tamba Governu investe, maibe iha tentasaun ba impedimentu ba prosesu Dezenvolvimentu Komunitáriu nian.

 

Hau sei lembra, desde Ukun Rasik Áan, depois Referendum 1999, Dezenvolvimentu barak mak tama iha suku Lore, maibe hirak neé labele realiza tamba iha intervensaun husi ema sira nebeé iha kompetensia, iha poder Polítika, iha Poder finanseira, ba Dezenvolvimentu nebeé tama iha Suku Lore Postu Lospalos Munisipiu Laútem. Hau koalia nuneé, tamba Hau rasik sai sasin, hareé ho matan, rona ho tilun nuúdar Lore oan, iha altura nebaá.

 

Iha evidensia ida nebeé Hau presija atu sita, kona ba Dezenvolvimentu iha suku Lore I nebeé kansela ka la realiza, ikus mai Povo Lore I sao Vítima mak hanesan tuir mai neé:

1. Beé Moós

Iha tinan 2000, hafoin Referendum, Ajensia Internasional balun(la lembra naran Ajensia) ba halo Survey iha Aldeia Chai, Suku Lore I, atu dada beé moós, hodi distribui ba Populasaun tomak iha Suku Lore I, maibe la realiza tamba iha impedimentu husi Komunidade balun, la ho rajaun. Maibe ikus mai deskobre sai hateten, impedimentu neé akontese tamba hakarak projetu neé, projeta husi Kompanha Lokal husi Suku Lore I nian.

2. Edukasaun

Iha altura nebaá, 2006 ka 200 (la sala) primeiro Governu hakarak harií Eskola Ensino Báziku iha aldeia Chai, Suku Lore I, nuúdar sentru ensinu aprendijajen ba Etudante sira husi Suku Lore I no Lore II, maibe la realiza tamba impedimentu mos husi populasaun sira, tamba hetan mos influensia husi kompanha lokal balun, nebeé iha ligasaun família, ikus mai projetu nee la realiza, no halo kedan transferensia konstrusaun mai iha Escola Pre-secundária Númeru 1 Lospalos, oras neé nakfilak sai (Escola Secundária Lere Anan Timur) iha Culuhun Lospalos.

3.Estrada

Tuir informasaun nebeé iha, estrada rural ligasaun Lospalos Villa ba Suku Lore I no Lore II halaó ona, maibe kompanha Lokal sira husi Suku Lore I hadau malu; hakarak projeta hotu, ikus mai projetu kansela. Hirak neé hotu, Povo mak sai vítima ba interesse Kompanha lokal sira nian.

 

Impaktu husi hirak neé hotu, Povu Lore oan sira sai ona Vítima ba Dezenvolvimentu, liu-liu problema estrada.

Kauza husi neé mak hanesan:

1. Kareta Baku-fila, rejulta komunidade balun tenke mate, no balun kanek grave

2. Ambulansia susar atu transporta Komunidade nebeé moras mai Sentru saúde Lospalos.

3. Prosesu tratamentu saúde ba komunidade paradu durante neé.

4. Komunidade susar tebes atu lori produtu lokal ba asesu merkadu Munisipal.

 

Maske problema neé akontese iha públiku nia matan, liu-liu Kompanha Lokal sira husi Lore oan, maibe sira la iha sentidu Nasionalismu, atu váloriza komunidade Lore nebeé terus ba rai neé, lakon família, lakon buat barak iha prosesu Luta Ukun Rasik áan. Sira nia espíritu Nasionalismu namlele ona, tamba kakutak nakonu ona ho osan, hafalun ho Interesse Grupu nian, hodi haluha interesse komunidade.

 

Dalabarak sira uja pensamentu rásiu ba Dezenvolvimentu, maibe nunka lembra passadu ba terus hotu nebeé Povo infrenta durante neé, ikus mai Povo Lore mak sai vítima ba prosesu Dezenvolvimentu. Estudante no Juventude sira husi Lore, esforsu no tenta nafatin, diskute atu buka solusaun ba Dezenvolvimentu nebeé kestionavel, maibe nafatin la iha solusaun, tamba la iha poder ka kompetensia absoluta hodi bele hetan influensia ba Governu nia desizaun, hodi tau matan ba problema nebeé populasaun infrenta hanesan Estrada, Beé moós, Infra-Estrutura ba Semtru Saúde, Edukasaun no seluk.

 

Tamba ida neé, Hau nuúdar Lore oan, rekomenda ba Parlamentu Nasonal atu uja nia kompetensia nuúdar órgaun Fiskalizador, tun ba baze hodi fiskaliza Infra-Estrutura Báziku iha Suku Lore, nuneé bele sente kondisaun nebeé iha. Hakarak atu salienta mos katak Hahuú Primeiro Governu toó agora, Lore oan sira simu deit promesas sira husi Partidu Polítiku sira hodi deklara Governu sei tau atensaun kuandu hetan fiar, maibe realidade hatudu, buat hotu lao la tuir promesas nebeé iha.

 

Tuir Istória, Lore nia oan sira barak oferese nia áan ba luta; lakon família, lakon buat barak, ho objetivu ba ukun rasik áan. Iha tempu ukun áan, Lore nafatin vítima ba rejultadu Independensia; liu-liu ba Dezenvolvimentu.

Husi ida neé, atu afirma katak, Lore oan sai Éroi iha Luta, maibe iha Ukun rasik áan, parese sai Oportunista, tamba ida neé mak la iha dalan atu investe Dezenvolvimentu iha nebaá toó agora.

 

Maske Problema neé Povo infrenta, maibe Lore oan orgullu ba nia rekursus Humanus; tamba Lore nia oan sira hetan oportunidade kontribui iha Instituisaun Estado sira.

Lore oan sira nebeé asume knaár boót ida iha Órgaun Estado no Institisaun Estado sira:

1. Vise Xefe Estado Maijor General Forcas Armadas Brigadeiro General Cornelio Ximenes "Maunana"

2. Eis Ministro Defeza, atual Deputado Parlamentu Nasional Sr. Jose Agustinho Sequeira Somotxo

3. Eis Deputado Parlamentu Nasional, atual Prezidente Consellu Veteranus Munisipiu Laútem Sr. Aurelio Freitas Ribeiro.

4. Eis Ministro Justica Sr. Ivo Valente.

Inklui intelektual balun nebeé la temi ida-idak nia naran, nebeé halaó knaár iha Instituisaun Militar no Polisia nian.

Atu konklui katak, Lore oan sira orgullu tebes ho nia emar sira nia knaár iha Órgaun Estado sira, liu-liu iba nivel polítika, maske iha Parlamentu Nasional nebaá, la diskute problema Lore nian. Maibe Orgullu nafatin apoiu, hodi hamorin nafatin Lore nia naran iha Estado, maske Dezenvolvimentu nakonu ho rai rahun husi dalan tama toó dalan termina nian.

Lore oan prontu nafatin, loke dalan ba se deit bele buka votus liu husi Eleisaun, ikus mai haluhan total kontribuisaun nebeé oferese, ida neé mos la sai kestaun, importante mak Estado ida neé lao ho hakmatek, ho Paz no Estabilidade, mak sasukat ida ba Lore oan sira nia mehi husi Éroi sira nian ba Ukun Rasik Áan.

 

Atu hakotu opiniaun neé, Hakerek naín hakarak rekomenda ba Órgaun Eatado sira, liu-liu Parlamentu Nasional, no Governu:

1. Tenke tun ba Fiskaliza Dezenvolvimentu Infra-Estrutura Báziku iha Suku Lore, Postu Lospalos-Laútem.

2. Buka hatene motivu husi impedimentu Kompanha Lokal sira ba projetu sira nebeé akontese iha Lore, liu-liu Estrada, no Beé Moós.

3. Husu ba Governu atu tau netik atensaun ba Problema Estrada, Beé moós, Seitor Súde, Aktividade Desportiva, no seluk taán nebeé Povo infrenta durante neé. REMATA

akerek Naín: Amito Qonusere Araújo, hela fatin Bairo Puasoru, Aldeia Chai, Suku Lore I Lospalos, númeru kontaktu +67077639282, E-mail: amitortl@gmail.com



ARQUIDIOCESE DILI HALAO MISSA ABERTURA DA EXISTENCIA BA DALA 80
Segunda, 07 Sep 2020, 13:29:37 OTL, Le'e : 154 Dala
ARQUIDIOCESE DILI HALO TINAN 80
Segunda, 07 Sep 2020, 11:59:46 OTL, Le'e : 161 Dala
ARCEBISPO DOM VIRGILIO: PARABENS BA SARANI HERA
Segunda, 07 Sep 2020, 09:34:04 OTL, Le'e : 168 Dala

Komentariu