Sexta, 27 Novembru 2020, OTL
Breaking News

Sexta, 19 Jun 2020, 09:15:35 OTL, 273 View Ruben Conceicao da Silva, Kategori : Nacional

OPINIAUN neé la reprejenta Instituisaun nebeé haknaár áan ba, maibe nuúdar espresaun pessoal, nebeé atribui iha Konstituisaun RDTL ba Liberdade Espresaun nian iha artigu 40 kona ba Liberdade Koalia no Informasaun Loloós nian.

 

Tópiku ba Hau nia opiniaun neé hamosu perguntas boót ba Hau, wainhira Hau dada Sigaru loloón ida, ho kafe kopu ida, hodi leé notisias sira nebeé fo sa iha Mídia Sosial husi utentes sira, no mídia públiku husi Jornalista sira.

 

Nuúdar sidadaun ida, iha ona Direitu votu sekreta ba Partido Polítika ida iha kada tinan 5, sente admira, hakfodak tebes ho situasaun Polítika rai laran, Étika Komunikasaun husi ema ida ba ema seluk, iha diferensia ona, no mais pior liu asaun entre sidadaun sira hatudu ba malu, la hatudu ukun nebeé diak, toó reprejentante Povo iha Parlamentu Nasional, nuúdar Uma Lulik, Uma Fukun Povo Maubere ida neé nian.

 

Ita labele halo ona análiza sientífika hodi sukat kapasidade ema ida-idak nian, hodi muda mentalidade, tamba étika diak entre ema ida-idak neé depende ba ukun uma laran nian. Iha tempu bizavon sira, Avo sira hameno husi jerasaun ba jerasaun toó agora mak; Ukun ho diak, mai husi edukasaun uma laran; Ukun nebeé rásio, sei eduka sosiedade nuúdar meius ida, transforma família ba sosiedade ho máduru. Lia fuan neé mak sei lori ita nia viajen toó Ukun Nasaun nian, toó Ukun Rasik Áan.

 

Ida neé ita liga ba Ukun ida modernu; kontekstu Ukun Timor nian, ukun Bizavon sira nian nebeé hatuúr husi jerasaun ba jerasaun namlele ona, tan la iha ona ukun ida lolós, hodi ukun jerasau sira atu moris tuir Ukun nebeé diak. Ezemplu konkreta; Timor oan sira nia ukun iha Uma Fukun (Parlamentu Nasioanal) hahuú namlele ona, no neé hatudu imajen nebeé la diak ba jerasaun tuir mai. Étika Komunikasaun durante neé públiku akompanha iha Uma Fukun Parlamemtu Nasional iha diferensia boót ho Uma Fukun Kultural. Tan sá mak Hau dehan nuneé, tan Lia fuan Uma Fukun neé lia fuan kroat, lia fuan nebeé iha nia válor áas tebes, tamba Uma fukun neé mak halibur ema hotu-hotu husi jerasaun ida nian, atu respeita malu, rona malu, sadia malu, hahií malu nuúdar maun ka alin, feton ho naán, hodi solusiona rajaun ida ba moris naruk husi jerasaun uma fukun ida nian. Karik aplika ba Uma Fukun Parlamentu Nasional mos nuneé, nia ukun la seluk, la leét ho Ukun Uma fukun nian; maibe saída mak akontese, diferente tebes, no ida neé mak sei estraga husar talin jerasaun Timor oan sira nian iha futuru.

 

Toó oras neé, Estado RDTL seidauk haloót meja no kadeira nebeé baku rahun iha Uma fukun Parlamentu Nasional, nebeé harií ho ruin no raán, suku ho kanek no terus, prega ho mataweén, mak babeur ona sira; tan la hakilar ona Povo nia moris, la haloót ruin be namakari iha fatuk leét, la hamoós ona raán be nafurin iha iha dolok oan, raán nebeé sulin iha kampu Revolusaun nian, sulin toó tasi. Iha Uma fukun nebaá; loron ba loron, tula ibun ba malu, hatudu liman ba malu, rai odio ba malu, mak ukun ida la hahií no hanai ona Éroi sira nia Luta ba Ukun Rasik Áan.

 

Étika Komunikasau iha Uma Fukun Parlamentu Nasional, nebeé hafalun ho Tais Timor husi Munisipiu ida-idak nian, hahuú mihis ona, tan anin Inimigu, ran inimigu suút ona toó laran hodi hafahe malun, hatun malun entre Maubere oan sira iha uma Fukun Parlamentu Nasional nuúdar reprejenta Povo iha Órgaun Lejislador; Órgaun ida be kria Ukun Tara no Bandu nian iha Rai Lulik Timor Leste.

 

Lian sadia no hahií malun iha Uma Fukun Parlamentu Nasional laek ona, la folin ona. Povo nia moris hafalun ho Ódio malun, trata malu, hatudu liman ba malu, ikus mai Povo sei sai nafatin Anju guarda ida, hodi salva sira, wainhira Loron no oras besik Eleisaun toó dadauk; sira beé kaer ukun sei lori promesa waín ba waín toó Sikun ida ba sikun seluk, ba Povo sira atu buka votus maske moe ona, maibe la sente moe, la senti áan sá mak halo ona, so iha deit mak interesse ba áan, maske hakilar ho Povo nia terus no susar.

 

Husi buat hirak neé hotu, hatudu momoós katak, Étika Komunikasaun iha Parlamentu Nasional sei labele fo benefísiu diak ho direita ba Povo no Nasaun durante periodu mandatáriu. Tuir loloós senhor/a membru/Reprejentante Povo iha Parlamentu Nasional hatudu kapasidade edukativu, ho meius polítika reprejentativu ba Povo no Nasaun, atu hadia no diskute kondisaun ka problema nebeé povo infrenta, liu-liu Luta hasoru kiak, Edukasaun, Saúde, Estrada, Beé moós, Eletrisidade, Seguransa nebeé diak, no seluk tan, inklui Luta hasoru funu Global Pandémia Covid-19. Ida neé mak assuntus adekuadu no sai ajenda prioritáriu durante mndatáriu nuúdar Reprejenta Povo iha Uma Fukun Parlamentu Nasional.

 

Durante ita hotu observa, situasaun polítika nasaun nian, afeta direita ba Povo nia moris, liu-liu Dezenvolvimentu la lao ba oin, buat hotu pátina iha fatin, tamba deit interesse Partidárismu domina ona líder sira nia polítika rásiu iha kampanha eleitoral nian. Ikus mai povo sente deit promesa husi Ukun Nain sira. Povo la husu Dezenvolvimentu Luxuáriu, maibe nesesidade báziku nuúdar meius ida atu fasilita Pov nia moris ba Dezenvolvimentu Nasional.

 

Wainhira asaun repete akontese bebeik iha Parlamentu Nasional, Povo no Nasaun sei labele sente Dezenvolvimentu Nasional ida nebeé fo satisfasaun ba jerasaun tuir mai, no iha neé hatudu sinal katak, Povo falla hili reprejentante ida nebeé hamroók ba kadeira, hamlaha ba kargu, no dukur ba regaliais sira, no sente áan nuúdar Liurai boót iha konfiansa nebeé atribui.

 

Hafoin Hau sunu sigaru hotu, huú nia suar sai, hau hateke sigaru nia suar, furak tebes, hamaluk tebes Hau, akompanha ho kafe kopu ida, Hau sente kontenti, maibe triste kuandu loke Telefone hareé Asaun iha Uma fukun Parlamentu Nasional, nebeé baku Hau nia hirus matan, hamosu hau nia neon hodi hakilar mesak iha uma tatiís ida be Hau tur iha Okos, Hau nia lian hakilar nuneé: Ukun iha Uma Fukun Parlamentu Nasional hanesan Ukun Hadau rebusadu husi Labarik kiík sira nebeé halimar iha rai rahun, tanis ba rebusadu, maibe derepente han rebusadu ho inus beén, kontenti no haksolok, dalaruma hamnasa mesak-mesak, kuandu foti ona rebusadu husi nia belun kiík ida be halimar hamutuk.

 

Buat hirak neé hotu, hakerek naín tatolin ba Ukun Naín sira iha Estado neé atu:

1. Bolu malu, buka malu hodi hatuúr naksalak nebeé iha, kasu salan sira hotu, nuneé hakman fali naha todan iha kabas.

2. Soe ona égoismu nuúdar Liurai. Tau Iia fuan LIURAI iha nia fatin, hakuak malun ba nuúdar atan ba Estado, no váloriza malu nuúdar lisan nebeé hatuúr ona iha tempu Beiala sira nian, hodi hatuúr fali lia fuan kroat nebeé sai husi ibun.

3. Ida-idak ba konfesa áan, kasu sala iha Maromak nia futar oin, iha Lisan oin, no perdua malu nuúdar Timor oan, husar talin ida, fatin ida ba fakar raán nian nebeé halulik ona.

 

Hau nia lian nebeé kiík, Hau hakilar iha fatin doók neé, ba Makaer ukun sira, liu-liu ba Xefe Estado Francisco Guterres Lu-Olo, no Líder Karismátiku Kay Rala Xanana Gusmão, Primeiro Ministro Taur Matan Ruak, Secretário Geral FRETILIN Dr. Marí Alkatiri,  Xefe Estado Maijor General Forças Armadas Maijor General Lere Anan Timur, atu tatoli mensajen ruma ba jerasaun sira beé raán nakali hela iha Uma FUKUN PARLMENTU NASIONAL atu hadoók áan ona husi komunikasaun destroi, no prioritiza Povo nia moris ba interesse Nasional.

 

Husu mos ba Naí Lulik sira Igreja Katólika nian, Bispo Dom Carlos Filípe Ximenes Belo, Dom Basilio do Nascimento, atu harohan ba Naí Maromak beé leten áas ba, atu perdua sira nia salan, no harohan atu hetan Grasa Maromak nian, atu fo hanoin diak ba sira, hamalirin sira neon, nuneé bele halaó knaár tuir Ukun fuan Maromak nian, no orasaun nebeé Maromak rasik hanorin mai ita.

 

Hau nia sigaru lulun ida hotu ona, Kafe kopu ida mihis ona, Hau nia lian laek ona, Hau termina ona Hau nia espresaun iha nakukun neé, no termina ona; karik iha lia fuan Naksalak iha hakilar ohin neé, Haraik áan nafatin hodi hetan perdaun husi Makaer Ukun sira, hanorin hau ba, hasee hau ba, lia fuan naksalak beé hakanek imi fuan, borus toó neon. REMATA

 

Pintor Liafuan: Amito Qonusere Araújo. Jornalista RTTL-EP, númeru kontaktu 77639282, E-mail: amitortl@gmail.com

   
 
   

 

 



ARQUIDIOCESE DILI HALAO MISSA ABERTURA DA EXISTENCIA BA DALA 80
Segunda, 07 Sep 2020, 13:29:37 OTL, Le'e : 154 Dala
ARQUIDIOCESE DILI HALO TINAN 80
Segunda, 07 Sep 2020, 11:59:46 OTL, Le'e : 161 Dala
ARCEBISPO DOM VIRGILIO: PARABENS BA SARANI HERA
Segunda, 07 Sep 2020, 09:34:04 OTL, Le'e : 168 Dala

Komentariu